Սերժ Սարգսյանի՝ Կրեմլից արած այն հայտարարությունը, որ Հայաստանը մտադիր է մտնել Մաքսային միություն և այդ ուղղությամբ համապատասխան պրակտիկ քայլեր ձեռնարկել՝ հետագայում Եվրասիական տնտեսական միության ձևավորմանը մասնակցելու համար, հանրության մեջ և եվրոպական մի շարք կառույցներում քննարկումների տեղիք տվեց: Մինչ այդ Հայաստանը լայնորեն համագործակցում էր ԵՄ-ի հետ՝ Խորը և համապարփակ ազատ առևտրի գոտու պայմանագրի նախաստորագրման շուրջ:
Հետևելով Սերժ Սարգսյանի հայտարարությունից հետո կատարվող իրադարձություններին՝ այսօր Հայաստանում Ֆրանսիայի դեսպան Անրի Ռենոն լրագրողների հետ զրույցում հայտարարեց, որ իրենք հասկացել են՝ Հայաստանը ցանկանում է շարունակել իր համագործակցությունը Եվրամիության հետ՝ բոլոր ոլորտներում և բոլոր ձևաչափերում: «Մեզ գոհունակություն է պատճառում Հայաստանի որդեգրած վճռականությունը՝ շարունակել Եվրոպական կառույցների հետ երկխոսության շարունակման գործընթացը բոլոր ոլորտներում: Մենք բնականաբար ցանկանում ենք, որ Հայաստանը շարունակի մնալ եվրոպական թեմատիկային առնչվող օրակարգում և քաջալերում ենք Հայաստանին՝ շարունակել խորացնել ԵՄ-ի հետ մերձեցման որդեգրած քաղաքականույթունը, իսկ այս ուղղությամբ Հայաստանի գործադրած բոլոր ջանքերին սատարելու է Ֆրանսիան»:
Այն հարցին, թե, այնուամենայնիվ, Վիլնյուսում նախաստորագրում տեղի կունենա՞, նա պատասխանեց, որ բոլորը ցանկանում են՝ Հայաստանի հարցը շարունակվի մնալ ԵՄ օրակարգում: Դա ենթադրում է քննարկումներ և բանակցություններ: «Բոլոր ձեռքբերումների համար մեր գոհունակությունն ենք հայտնում. Հայաստանը կարողացավ Արևելյան գործընկերություն ծրագրի ողջ ընթացքում աճ գրանցել, և մենք պարզապես ցանկանում ենք, որ այս երկիրն այդ ուղղությամբ առաջ ընթանա: Ես ձեզ ասացի այն, ինչ կարող էի ասել, և այն, ինչ կար, և ինչպես ասում են՝ կապրենք, կտեսնենք»,- եզրափակեց պարոն Ռենոն:
