Վրաստանի վարչապետ Բիձինա Իվանիշվիլին էստոնացի լրագրողների հետ հանդիպմանը ևս մեկ անգամ իր վերաբերմունքն է հայտնել 2008թ. օգոստոսյան պատերազմի հանդեպ՝ այն անվանելով «ագրեսիա» և «բռնի գործողություն», որն իրականացրել է Ռուսաստանը:
«Անկասկած, դա եղել է ագրեսիա, բռնի գործողություն Ռուսաստանի կողմից: Այդ գործողությունների արդյունքը Վրաստանի ինքնիշխան տարածքների շրջափակումն էր, ինչը ոչ մի արդարացում չունի: Ռուսաստանի հետ պատերազմից հնարավոր էր խուսափել, եթե Սաակաշվիլին մտածված գործեր: Ցավոք սրտի, նա աններելի սխալ թույլ տվեց, որը մեզ հանգեցրեց նման արդյունքի»,- ասել է Իվանիշվիլին:
Նախարարների կաբինետի ղեկավարը շնորհակալություն է հայտնել Էստոնիային՝ պատերազմի ժամանակ Վրաստանին աջակցելու համար:
«Վրաստանը կապացուցի, որ եվրոպական երկիր է: Վրաստանը կդառնա Եվրամիության և ՆԱՏՕ-ի անդամ: Դա մեր ռազմավարական ընտրությունն է, որն արել է վրացի ժողովուրդը, և մենք հետ չենք կանգնի ընտրված ուղուց»,- ասել է Իվանիշվիլին: