Երևանում ՆԱՏՕ-ի տեղեկատվական կենտրոնում այսօր հյուրընկալվել էր Հայաստանում Ֆրանսիայի արտակարգ և լիազոր դեսպան Անրի Ռենոն, որը Ֆրանսիայի՝ ՆԱՏՕ-ին անդամակցության պատմությունը մանրազնին ներկայացնելուց հետո պատասխանեց լրագրողների հարցերին:
«Առաջին լրատվականը» մատնանշեց օրերս ՀՀ ԱԳՆ-ի հաղորդագրությունն այն մասին, համաձայն որի՝ Ֆրանսիայի նախագահի դիվանագիտական և արտաքին քաղաքականության հարցերով խորհրդական Ժան-Դավիդ Լևիտը Հայաստանի ԱԳ նախարար Էդվարդ Նալբանդյանի հետ հանդիպմանը քննարկել է Ֆրանսիայի նախագահ Նիկոլա Սարկոզիի՝ այս տարվա երկրորդ կեսին նախատեսված Հայաստան այցելության հետ կապված հարցեր:
Ուստի «Առաջին լրատվականը» փորձեց ճշտել՝ արդյո՞ք Ֆրանսիայի նախագահի այցը տարածաշրջանային է լինելու, ի՞նչ նպատակ է ունենալու, որո՞նք են լինելու այցի հիմնական շեշտադրումները: Սակայն ՀՀ-ում Ֆրանսիայի դեսպանը նշեց միայն, որ ՀՀ ԱԳՆ-ի մամլո հաղորդագրությանը որևէ բան չի կարող ավելացնել, իսկ ինչ վերաբերում է Ֆրանսիայի նախագահի այցերին, ապա դա բացառապես Ելիսեյան պալատի մենաշնորհն է. «Բայց կարծում եմ, որ ԱԳՆ-ի հաղորդագրությունը բավական ստույգ է և բավական խրախուսող»,- հավելեց Անրի Ռենոն: