Գյումրիի Ժուռնալիստների «Ասպարեզ» ակումբի նախագահ Լևոն Բարսեղյանը այսօր «Համամարդկային արժեքների և իրավապաշտպանների նկատմամբ ոտնձգությունները Հայաստանում. դրանց դիմակայելու ռազմավարությունները» հանրային քննարկմանը իր ելույթը սկսեց ռուսերեն ողջույնով, ինչը ուղղված էր Սերժ Սարգսյանի՝ ՄՄ-ին անդամակցելու պատրաստակամությանը:
Խոսելով ատելության և բռնության հրապարակային և անպատիժ կոչերի մասին՝ Լևոն Բարսեղյանը նշեց, որ խոսքի ազատությունը բացարձակ արժեք է, բայց բոլորը պետք է իմանան, որ յուրաքանչյուրը պատասխանատու է իր արտահայտած բոլոր մտքերի համար:
Նա նշեց, որ արժանապատվության հարց է սեփական խոսքի համար պատասխան տալը, հրապարակային բանավեճին պատրաստ լինելը:
«Մեղավոր է Տիգրան Առաքելյանը և անմեղ՝ Սուրիկ Խաչատրյանի որդին»,- ասաց Լևոն Բարսեղյանը՝ հավելելով, որ ընտրովի արդարադատություն իրականացնելը կհանգեցնի լրջագույն հետևանքների:
«Ես անկեղծորեն հավատում եմ վերարդարությանը, ուշ թե շուտ ամեն ինչ փոխհատուցվելու է, և միամտություն է կարծել, որ արդարության դեմ մեղանչող մարդիկ մնալու են անպատիժ»,- ասաց բանախոսը:
Նա նկատեց, որ այս իշխանությունները վաղուց են ապացուցել, որ մարդու հիմնարար իրավունքները անկարող են հարգել, մեր ազգային արժեքները կեղծավորաբար հակադրվում են մարդու հիմնարար իրավունքներին:
«Եղբայր, դուք եք ստորագրել, որ հարգում եք մարդու հիմնարար ազատությունները և իրավունքները: Եղբայր, հրաժարվեք, ասեք, որ հիմա ուժի իշխանություն եք»,- ասաց նա:
Լուսանկարը` PanARMENIAN Photo-ի
