Այն բանից հետո, երբ ՀՀ նախագահ Սերժ Սարգսյանը Մոսկվայում իր գործընկեր Վլադիմիր Պուտինի հետ հանդիպման ընթացքում հայտարարեց, որ Հայաստանը պատրաստվում է անդամակցել Մաքսային միությանը, մի շարք քաղաքական գործիչներ, ինչպես նաև «Ազատ դեմոկրատներ» կուսակցությունը, հայտարարեցին, որ դա կհակասի ՀՀ Սահմանադրությանը: «Մաքսային միությանը միանալ նշանակում է վերադարձ նորացված կայսերական համակարգ։ Մենք այս գործընթացը գնահատում ենք իբրև հակասահմանադրական քայլ, քանզի ՀՀ Սահմանադրության առաջին հոդվածը հռչակում է, որ «Հայաստանի Հանրապետությունն ինքնիշխան, ժողովրդավարական, սոցիալական և իրավական պետություն է», իսկ ՀՀ Սահմանադրության 114-րդ հոդվածի համաձայն` «Սահմանադրության 1-ին, 2-րդ և 114-րդ հոդվածները փոփոխման ենթակա չեն», -ասված էր կուսակցության տարածած հայտարարության մեջ։
Սակայն որքան էլ առանձին կուսակցություններ պնդեն,որ սա հակասահմանադրական է, և որ այս քայլով ոտնահարվում է ՀՀ սահմանադրութունը, իշխանությունը փաստացիորեն կարող է «ապացուցել», որ հակասահմանադրական և ոչ մի քայլ այս որոշման մեջ չկա:
Երևանի պետական համալսարանի իրավաբանական ֆակուլտետի Սահմանադրական իրավունքի ամբիոնի դոցենտ Վարդան Այվազյանն «Առաջին լրատվական»-ի հետ զրույցում ասաց, որ Մաքսային միությանն անդամագրվելը ոչ մի կերպ չի հակասում ՀՀ Սահմանադրությանը:
Մենք մեջբերեցինք ինքնիշխանությունը կորցնելու վերաբերյալ հիմնավորումները, ինչին ի պատասխան՝ Վ․ Այվազյանն ասաց. «Սա չի հակասում: Ես չգիտեմ՝ ինչ տեսակ պայմանագիր է լինելու։ Եթե միջազգային պայմանագրի տեսքով լինի, ապա այն Ազգային ժողովը պետք է վավերացնի, ու նոր ուժի մեջ մտնի, բայց սա ինքնիշխանության հետ կապ չունի: Սա ոչ մի կետով չի հակասում ՀՀ Սահմանադրությանը: «Ինքնիշխանություն» նշանակում է պետության գերակայությունը երկրի ներսում և անկախությունն արտաքին հարաբերություններում: Նախագահը պետության անունից գործարք է կնքում ընդամենը։ Սա, հակառակը, վկայում է ինքնիշխանության մասին»:
Եվ չնայած, որ Հայաստանում անվստահություն կա բոլոր, այդ թվում նաև Սահմանադրական դատարանի նկատմամբ, դժվար է պատկերացնել, թե Ազգային ժողովի մեծամասնությունը կգիտակցի և կընդունի, որ անդամագրվելով Մաքսային միությանը՝ Հայաստանը կկորցնի իր ինքնիշխանությունը:
