Աշխարհում կտրուկ աճել են սեռական ազատության ու անձեռնմխելիության դեմ ուղղված հանցագործությունները: Սեպտեմբերի 9-ին ԱԺ աշնանային նստաշրջանի առաջին նիստի ժամանակ ԱԺ պետաիրավական հարցերի մշտական հանձնաժողովի նախագահ Դավիթ Հարությունյանը նշեց, որ 2012-ին նախորդ տարվա համեմատ նշված բնույթի հանցագործությունները 34-ով ավելացել են. եթե 2011-ին դրանց թիվը 71 էր, ապա 2012-ին՝ 105, իսկ 2013-ի առաջին կիսամյակում հանցագործությունների թիվը հասել է 159-ի, այսինքն՝ 50 տոկոսով ավելի նախորդ տարվա համեմատ:
Հարությունյանի հեղինակած «ՀՀ քրեական օրենսգրքում փոփոխություններ և լրացումներ կատարելու մասին» օրենքի նախագծի հիմքը հենց այս ցուցանիշներն են:
«Բավական լուրջ աշխատանք ենք կատարել ՀԿ-ների, հոգեբանների, փաստաբանների, իրավաբանների, միջազգային կառույցների հետ, փորձ է արվել մի շարք այլ հարցերի ևս անդրադառնալ: Չնայած այս նախագծի կարևորությանը՝ պիտի նշեմ, որ սա ընդամենը պայքարի մի հատվածն է արտացոլում»,- ասաց նա:
Հարությունյանը նշեց, որ «Բռնաբարություն և սեքսուալ բնույթի բռնի գործողություններ» հոդվածներում նախատեսվում է սահմանել որոշ նոր, որակյալ հանցակազմեր, երկու հոդվածների բուն էությունը նույնացված է, ուստի դիտարկումները նույնն են: Օրենքում սահմանվում է ավելացնել մի քանի կետ. հանցագործությունը կատարվել է ակնհայտ հղի կնոջ նկատմամբ, զենքի կամ այլ առարկայի գործադրմամբ կամ դրա սպառնալիքով, ուղղիչ հիմնարկում պահվող անձի նկատմամբ, կարգապահական գումարտակում կամ զորամասում զինծառայողի, բուժհաստատությունում բուժվող անձի նկատմամբ՝ նույն հիմնարկի աշխատակցի կողմից:
Հատուկ խումբ է համարվում արարքի առանձնապես վտանգավոր տեսակը՝ 18 տարին չլրացած անձի նկատմամբ այն անձի կողմից, ում վրա դրված է նրա խնամակալությունը: Կատարվել են նաև անօգնական վիճակն օգտագործելու հետ կապված ամրագրումներ: Այստեղ ներմուծվել է երեք չափանիշ. այն անձը, ով որոշակի հանգամանքների ուժով մշտապես կամ ժամանակավորապես զրկված է եղել հանցագործին դիմադրություն թույլ տալուց, չի գիտակցել կամ չի հասկացել իր արարքը, հանցագործությունը կատարվել է 12 տարին չլրացած անձի նկատմամբ:
«Երկրորդ չափանիշը մի փոքր վիճելի է: Այստեղ պետք է առանձնացնել հոգեբուժության և հոգեբանության ոլորտները, իրականում դրանք պետք է առանձնացնել: Կա նաև օբյեկտիվ մի հատկանիշ՝ 12 տարին չլրացած անձը, անկախ ամեն ինչից, միշտ որակվելու է այդ հոդվածներով»,- ասաց նա:
Հարությունյանը նշեց, որ նախագծի մշակման ընթացքում ուսումնասիրվել և հաշվի է առնվել նաև սեռական ազատության և սեռական անձեռնմխելիության դեմ ուղղված հանցագործությունների օրենսդրական կարգավորման վերաբերյալ մի շարք երկրների փորձը:
Նշված բնույթի հանցագործության համար խստագույն պատիժ սահմանելու առաջարկին ի պատասխան՝ Հարությունյանը նշեց, որ միջազգային պրակտիկայում նման փորձ եղել է, որն ավարտվել է զոհի սպանությամբ, հետևաբար, այսպես ասած, բարի կամքը հանգեցրել է վատ հետևանքների:
Օրենքի նախագծին ծանոթացեք՝ հետևելով հղմանը. http://parliament.am/drafts.php?sel=showdraft&DraftID=30611
