Իտալական La Stampa թերթի լրագրող Դոմենիկո Կվիրիկոն և բելգիացի մանկավարժ ու գրող Պիեռ Պիչինին դա Պրատան, ովքեր Սիրիայում առևանգվել էին 2013-ի ապրիլի սկզբին, սեպտեմբերի 8-ին ազատվել են գերությունից: Այս մասին հայտնում է Reuters գործակալությունը:
Իտալիայի վարչապետ Էնրիկե Լետան հաստատել է գերիների ազատ արձակման մասին տեղեկությունը: «Մենք չէինք կորցրել հույսն առ այն, որ բոլոր ջանքերը, որոնք ձեռնարկվել էին մի քանի ամիսների ընթացքում, հաջողությամբ կպսակվեն»,- ասվում է այս առնչությամբ տարածված պաշտոնական հայտարարությունում:
Կվիրիկոյի և Պիչինին դա Պրատայի ազատ արձակումը տեղի է ունեցել սիրիական իրավիճակի շուրջ աճող միջազգային լարվածության ֆոնին: Իտալիան դատապարտել է Դամասկոսին քիմիական զենքի ենթադրյալ կիրառման համար, սակայն հրաժարվել է միանալ երկրի դեմ ռազմական օպերացիայի անցկացման ԱՄՆ ծրագրերին, քանի որ ՄԱԿ-ը հավանություն չի տվել այդ օպերացիային:
2013-ի ապրիլին Սիրիայում ևս 4 իտալացի լրագրողներ էին պատանդ վերցվել, սակայն նրանց հաջողվել էր ազատել առևանգումից մեկ շաբաթ հետո:
