«Առաջին լրատվական»-ի զրուցակիցն է կառավարման փորձագետ Հարություն Մեսրոբյանը:
– Պարոն Մեսրոբյան, Մաքսային միությանը Հայաստանի անդամակցումն ինչպե՞ս կանդրադառնա գործարար միջավայրի վրա:
– «Գործարար միջավայր» մի քիչ ուժեղ է ասված, քանի որ մեր տնտեսությունն օլիգարխված է, և անկախ նրանից` ինչ միություններ կմտնենք, միևնույն է` օլիգարխիան կփորձի օգտագործել նոր հանգամանքները, քանի որ իր ձեռքում է նաև տնտեսական մրցակցությունը:
– Տնտեսության ո՞ր ճյուղերն ամենից շատ կազդվեն, գուցե` կշահեն այս անդամակցությունից:
– Եթե մենք սկզբունքորեն նայենք` Հայաստանի ստրատեգիկ ձեռնարկությունները գտնվում են Ռուսաստանի ձեռքին, հետևաբար` այս գերիշխման շնորհիվ ռուսական սեփականությունը կսկսի էլ ավելի աճել:
– Ապրանքների որակի վրա ինչպես կանդրադառնա: Մենք կառաջնորդվենք ռուսակա՞ն, թե նախկինի պես` եվրոպական ստանդարտներով, որ ավելի խիստ էին:
– Մենք նախկինում ոչ մի ստանդարտով չենք առաջնորդվել: Օլիգարխված տնտեսությունն ունի միայն մեկ ստանդարտ` օլիգարխիայի ստանդարտը:
– Ամեն դեպքում, կարո՞ղ ենք ասել` այս համագործակցությունից մեր տնտեսությունը կշահի:
– Անկախ նրանից` մենք մտնում ենք Եվրոպայի ասոցացման շրջանակ, թե Մաքսային միություն, երկու դեպքում էլ մենք ստրատեգիկ իմաստով կորցնում ենք, որովհետև կորցնում ենք մեր սուվերենության զգալի մասը, իսկ դա նշանակում է, որ մենք կամաց-կամաց ավելի ենք հեռանում ինքնիշխան պետության կարգավիճակից` բոլոր իր հետևանքներով: Սա էլ իր հերթին նշանակում է, որ անկախ նրանից` մենք գնում ենք դեպի Եվրոպա, թե դեպի Ռուսաստան, մեր պետության, մեր ազգի համար կարևորագույն հանգուցային հարցերը լուծելու ենք ոչ մենք, հետևաբար` այդ հարցերը լուծվելու են` ի շահ այդ խոշոր կոնգլոմերատների՝ լինի դա Եվրոպական միություն, թե Մաքսային միություն: Այսինքն` մենք պիտի պատրաստ լինենք, որ ունենալու ենք ոչ հայանպաստ որոշումներ, որովհետև` ո՞վ ասաց, որ գերտերությունները կամ ինչ-որ միավորումներ պիտի գիշերը չքնեն և Հայաստանի մասին մտածեն: Նրանք կմտածեն իրենց մասին և ճիշտ կանեն:
