Ստամբուլի դատախազությունը դատարան է փոխանցել 12 տարեկանում ամուսնացած աղջնակի մասին գործը: Նա մեկ տարի անց երեխա է ունեցել: Պետական մեղադրող Սեյֆեթին Աթիջը պահանջում է խստագույնս պատժել դեռահասի ծնողներին և նրանց դատապարտել 30 տարվա ազատազրկման՝ հաղորդում է Timeturk.com-ը:
Քրեական գործի պատճառը աղջկանից ծնունդն ընդունած բժշկի՝ դատախազություն դիմելն է: Տեսնելով, որ նորաթուխ մայրիկը ծնվել է 1999-ին՝ բժիշկը չի հավատացել իր աչքերին: Աղջկա ծնողներին և սկեսրոջը միանգամից 2 հոդվածով մեղադրանք են առաջադրել՝ «երեխաների նկատմամբ սեռական բռնություն» և «մարդու ազատազրկում»:
Ըստ լուրերի՝ 2011-ին Ստամբուլի 12-ամյա բնակչուհի Ֆիգեն Կ.-ի ծնողները ստիպել են նրան կրոնական ամուսնություն գրանցել իր անչափահաս զարմիկ Օմեր Չ.-ի հետ: Դրանից հետո երիտասարդ զույգն առանձին տուն է տեղափոխվել և սկսել համատեղ կյանքը՝ չնայած անձնագրում բացակայել է ամուսնության մասին կնիքը:
«12 տարեկան աղջիկն արդեն հասուն աղջիկ է: Մանավանդ, ամուսնությունը տեղի է ունեցել նրա կամքով և ցանկությամբ: Նա չի բողոքում, և ինքն էր դա ուզում: Ինչո՞ւմն է բանը»,- ասել է աղջկա հայրը՝ Ալի Ռիզան:
