Կոմիտաս 5 հասցեում արդեն մի քանի օր է, ինչ շինարարությունը վերսկսվել է: Բնակիչները բազմիցս ահազանգել են այդ մասին, սակայն առայժմ ոչ մի արդյունքի չեն հասել:
Կոմիտաս 5 ա հասցեի բնակիչ Գոհար Սահակյանի հավաստմամբ՝ 2010 թվականից իրենք պայքարում են անօրինականության դեմ, սակայն դեռևս ոչ մի արդյունքի չեն հասել: Նա նշեց, որ խախտումների վերաբերյալ բազմիցս ահազանգել են դատական ատյաններին, ի սկզբանե շինարարությունն ապօրինի է եղել, իրենք խոսել են մասնագետների հետ, իջեցրել են հարկերի քանակը, սակայն դա բավարար չէ՝ շինությունը կառուցելու համար:
Նույն հասցեի մեկ այլ բնակիչ՝ Սուսաննա Թերզյանն էլ հավելեց, որ 2011-ից սեփականատերը տարածքում ծառահատում է կատարել շինարարությունը սկսելու համար: Իրենք բազմիցս բողոքել են դրա դեմ, արգելանք է դրվել շինարարության վրա, սակայն այս տարի նորից վերսկսել են աշխատանքները, իսկ բողոք դիմումներից դեռևս պատասխան չեն ստացել:
Նա ասաց, որ Երևանի գլխավոր ճարտարապետի, քաղաքապետի հետ են հանդիպել, հայտնել են կառույցի շինարարության վերաբերյալ իրենց անհամաձայնությունը:
Նշենք նաև, որ տարածքը 2005 թվականին քաղաքապետ Երվանդ Զախարյանը առանց աճուրդի վաճառել է «Լիբեր» ՍՊԸ-ի տնօրեն, պարսկահայ Քեշիշ Աբրամին:
Մանրամասները դիտեք տեսանյութում:
