Հայաստանի ֆուտբոլի ազգային հավաքականը երեկ Պրահայում անցկացրել է ֆուտբոլի աշխարհի 2014 թվականի առաջնության ընտրական մրցաշարի հերթական հանդիպումը և կարողացել է 2:1 հաշվով հաղթել տանտերերին՝ Չեխիայի հավաքականին: Ընտրական մրցաշարում սա մեր թիմի երկրորդ անընդմեջ հաղթանակն էր, այն էլ հյուրընկալվելիս:
Մրցաշարն անհաջող սկսած Հայաստանի հավաքականի Չեխիայի նկատմամբ տարած հաղթանակից հետո ստեղծվել է այնպիսի մրցաշարային վիճակ, որ մեր հավաքականը անհաջող մեկնարկից հետո ներկայումս կարող է պայքարել խմբում երկրորդ տեղի համար, որը անցումային խաղի հնարավորություն է տալիս: Սեպտեմբերի 10-ին Հայաստանի հավաքականը կընդունի Դանիայի հավաքականին՝ Երևանում: Հավաքականի վերջին երկու խաղերում տարած հաղթանակները Հայաստանին վերստին ֆուտբոլային շունչ են հաղորդել երկրպագուների շրջանում կրկին ցնծություն է:
Հավաքականի հաղթանակը, ինչպես ասում են, իսկական ժամանակին էր, քանի որ Մաքսային միությանն անդամակցելու մասին շոկային որոշումից հետո հասարակությունը, մեղմ ասած, գտնվում է ընկճված վիճակում: Հավաքականի հաղթանակը մի իրադարձություն է, որը կարող է փոխել հանրային տրամադրությունները և ոգի տալ հասարակությանը, հասարակությանը տալ պայքարի օրինակ, պայքարի շունչ: Իսկ դա ներկայումս շատ կարևոր է, որովհետև ընկճվածությունը, անկումային տրամադրությունը պարզապես ունակ են կաթվածահար անել հասարակական կամքը: Որևէ ցավալի և վտանգավոր իրադարձություն անշրջելի, ճակատագրական է դառնում հենց նման տրամադրությունների պարագայում:
Այնպես որ, հասարակությանը պետք է լիովին հակառակը, և Հայաստանի ֆուտբոլի ազգային հավաքականն իր հաղթանակի շնորհիվ կարողացավ ապահովել հենց դա: Թեև այդ ամենը դեռ պետք է ամբողջացնել սեպտեմբերի 10-ին Երևանում Դանիայի հավաքականի նկատմամբ հաղթանակով: Ինչ վերաբերում է բուն խաղին՝ հաշվից դուրս, ապա պետք է խոստովանել, որ մեր տղաների խաղը ուներ, մեղմ ասած, ավելի լավը ցանկանալու տեղ, և հուսով ենք, որ այս հաղթանակը կոգևորի նաև հենց հավաքականի տղաներին, և նրանք շատ ավելի պատրաստ դաշտ դուրս կգան Դանիայի հավաքականի հետ խաղում:
Այսպիսով, Հայաստանի հավաքականն արդեն ունի 9 միավոր և չեխերի հետ ունի երրորդ ցուցանիշը Իտալիայից և Բուլղարիայից հետո: Մեզ անպայման հաղթանակ է պետք մնացած երեք խաղից երկուսում, առնվազն երկուսում: Հայաստանի հավաքականը մի քանի օր հետո կընդունի Դանիային, իսկ մոտ մեկ ամիս հետո էլ կընդունի Բուլղարիայի հավաքականին: Երկու հաղթանակի դեպքում, Հայաստանի համար գրեթե երաշխավորված կլինի երկրորդ հորիզոնականը: Իսկ դա կտա անցումային խաղի հնարավորություն՝ աշխարհի առաջնության եզրափակիչ փուլի ուղեգրի համար:
Շատ առաջ չընկնենք իհարկե, առայժմ առջևում Դանիայի հետ խաղն է, հաջողություն և հաղթանակ մաղթենք մեր հավաքականին: Մենք դրա կարիքն ունենք ոչ միայն որպես ֆուտբոլասեր, այլ նաև որպես հասարակություն, որը ներկայումս ունի հաղթահարելու բարդագույն խնդիրներ, և այն դրական էմոցիաները, որ առաջանում են ֆուտբոլային հաղթանակներից, կարող են մեծ դեր խաղալ խնդիրների լուծման համար անհրաժեշտ բարոյահոգեբանական լիցքերի առումով:
