Սննդի անվտանգության պետական ծառայությունը խստացնելու է վերահսկողությունը սննդի շղթայի օպերատորների կողմից սննդամթերքի անվտանգության և որակի կառավարման համակարգի ներդրման ուղղությամբ: Այս մասին ապրիլի 12-ին լրագրողների հետ հանդիպման ժամանակ ասաց ՀՀ գյուղատնտեսության նախարարության սննդամթերքի անվտանգության պետական ծառայության պետ Իշխան Կարապետյանը:
Նրա վստահեցմամբ` ծառայության 6 ամիսներին իրականացված աշխատանքները հնարավորություն են տվել ձևավորել այն նախադրյալները, որոնք հեռանկարային կտրվածքով թույլ կտան արագ փոխելու սննդի անվտանգության ոլորտում ձեռնարկվող միջոցառումները, որի նպատակով ծրագրում են շարունակել նախատեսված ուղղություններով աշխատանքները, և ներդնել նոր համակարգային մոտեցումներ:
«Ավարտին է հասցվելու սննդամթերք տեղափոխող բոլոր փոխադրամիջոցների սանիտարական անձնագրերի ներդրման գործընթացը՝ սահմանելով նաև պատասխանատվության միջոցներ, շարունակվելու է սպանդանոցային պարտադիր մորթի անցնելու ծրագիրը՝ ընդլայնելով մասնակիցների շրջանակը, գյուղատնտեսական կենդանիների նույնականացման համար ներդրվելու է հաշվառման և համարակալման թվայնացված համակարգ՝ հետագծելիության սկզբունքով վտանգը բացահայտելու և վարակիչ հիվանդությունների մոնիթորինգ իրականացնելու նպատակով: Աշխատանքներ են տարվելու սննդամթերքի անվտանգության վերաբերյալ սպառողների իրազեկվածության մակարդակը բարձրացնելու և սննդի շղթայի օպերատորների ռեյտինգավորման համակարգ ներդնելու ուղղությամբ»,- ասաց Կարապետյանը:
ՍԱՊԾ պետի ներկայացմամբ` նախատեսում են արտադրանքի և որակի կառավարման համակարգերի հսկողության բարձր մակարդակ ունեցող երկրներից որոշակի սննդամթերք ներմուծելու դեպքում վերանայել պահանջները, հեշտացնել ընթացակարգերը: Միաժամանակ, Սննդամթերքի անվտանգությանն պետական ծառայության առաջիկա ծրագրերում է լաբորատոր կարողությունների զարգացումը և միջազգային պրակտիկայում կիրառվող փորձաքննությունների նոր մեթոդների ներդրումը:
