Հայաստանում կար սահմանադրության բարեփոխումներ կատարելու անհրաժեշտություն: Այս մասին այսօրվա ասուլիսում հայտարարեց ՀՀ Արդարադատության նախարար Հրայր Թովմասյանը, ով օրերս ՀՀ Նախագահի հրամանագրով ստեղծված սահմանադրական բարեփոխումների հանձնաժողովի անդամ է` որպես իրավաբան գիտնական:
Լրագրողի այն հարցին, թե Սահմանադրության կոնկրետ, որ դրույթներն են փոփոխության ենթակա, Հրայր Թովմասյանը նշեց, որ հրամանագրում նշված են կոնկրետ խնդիրները, մասնավորապես մարդու իրավունքների պաշտպանության երաշխիքների, իրավունքի գերակայության, իշխանության թևերի միջև զսպումների ու հակակշիռների, կատարելագործման կառավարման համակարգի արդյունավետության բարձրացման հարցերը:
Նախարարն ընդգծեց, որ այդ խնդիրների լուծմանն ուղղված բարեփոխումները կարող են ներառել Սահմանադրության ցանկացած դրույթ:
Հրայր Թովմասյանը հիշեցրեց նաև, որ հանձնաժողովը մասնագիտական հանձնաժողով է, տեղի են ունենալու մասնագիտական քննարկումներ, որից հետո քննարկումները շարունակվելու են նաև քաղաքական ուժերի հետ: Սահմանադրական բարեփոխումները, ըստ Հրայր Թովմասյանի, անցնելու են բավական լայն քննարկումների փուլ:
