Եթե մինչ քաղբանտարկյալների ազատ արձակումը Լևոն Տեր-Պետրոսյանը զուսպ էր գնահատում Սերժ Սարգսյանի 3 տարվա ողբերգական, սնանկ, սնամեջ քաղաքականության արդյունքները, ապա այսօր նա նման խնդիր չունի: Այս մասին այսօր մեզ հետ զրույցում նշեց Հայաստանի քաղաքագետների միության նախագահ Հմայակ Հովհաննիսյանը: Նա նաև հիշեցրեց, որ Լևոն Տեր-Պետրոսյանը նույնիսկ չօգտագործեց ապրիլի 8-ի հանրահավաքի առիթը, որը պետք է նվիրված լիներ Սերժ Սարգսյանի պաշտոնավարման 3-րդ տարելիցին:
«Հիմա այդ խնդիրը լուծված է: Առաջիկա հանրահավաքը, որին ժողովուրդը սպասում է, պետք է նվիրված լինի իշխանության գործունեության շատ կոշտ գնահատականներին, այն տխրահռչակ արդյունքներին, որ իշխանությունը արձանագրել է 3 տարի անց: Սերժ Սարգսյանը խոստացավ, որ մինչև հունիս ժողովուրդը սեփական մաշկի վրա կզգա իր վրա ծանրացած սոցիալ-տնտեսական բեռի ծանրության թեթևացումը: Այս հարցերը պետք է բարձրաձայնվեն: Կամ՝ ո՞վ պետք է հրավիրի Սերժ Սարգսյանի ուշադրությունը այն խայտառակ լճացող փաստի վրա, որ գործող կառավարությունը՝ Տիգրան Սարգսյանի գլխավորությամբ, խորհրդարանում ունի ընդամենը 13 կողմնակից 131 պատգամավորների առկայության դեպքում: Սերժ Սարգսյանը պետք է հաջորդ օրն իսկ հրաժարական տար, այնինչ շարունակում է գործունեությունը: Որպես 20 տարվա պրակտիկ քաղաքագետ՝ կարող եմ հավատացնել, որ որևէ երկրում նման նախադեպ չի եղել»,- ավելացրեց Հմայակ Հովհաննիսյանը:
Ըստ Հմայակ Հովհաննիսյանի՝ մեր աչքի առջև մի կին՝ հանձինս Նինո Բուրջանաձեի, դուրս է եկել ռեժիմի դեմ, որն օգտվում է Արևմուտքի բացարձակ աջակցությունից: «Բայց անգամ կինն ըմբոստացավ, չնայած Վրաստանում այնպիսի ողբերգական իրավիճակ չկա, ինչպիսին Հայաստանում է: Չնայած այնպես չի եղել, որ Սաակաշվիլին գունազարդված խոստումներ է տվել և չի կատարել, ինչպես որ Սերժ Սարգսյանը»,- ավելացրեց Հմայակ Հովհաննիսյանը:
