Վերջին շրջանում ոստիկանությունն ու կրիմինալը զբաղված են հասարակական ակտիվիստների ուղղակի որսով, նրանց իրավունքները սահմանափակելով և ճնշումների ենթարկելով: Այսօր տեղի ունեցած մամուլի ասուլիսի ժամանակ այս մասին ասաց Armenia Today կայքի խմբագիր Արգիշտի Կիվիրյանը:
«Ակտիվիստները ճնշումների ենթարկվում են մեծամասամբ քաղաքի կենտրոնական հատվածներում, ուր բազմաթիվ տեսախցիկներ կան: Այնպես որ, ցանկության դեպքում ոստիկանությունը մի քանի ժամում կարող է բացահայտել ակտիվիստների հանդեպ ապօրինի գործողությունների հեղինակներին: Մինչդեռ նման քայլ չի կատարվում: Իշխանությունները հասկանում են, որ հասարակության ակտիվ հատվածին ճնշելով`կարող են առավել առաջ գնալ: Այս խմբերին «կոտրելը», սակայն, կբերի շատ ծանր հետևանքների, հետևապես կոչ եմ անում բոլորին միանալ ակտիվիստների բողոքի գործողություններին: Այսօր բոլորին էլ ակնհայտ է, որ Հայաստանում ոստիկանությունն ու կրիմինալը շաղկապված են միմյանց: Մեր երկրում քրեաօլիգարխիկ ռեժիմից անցում է կատարվում դասական ոստիկանական ռեժիմի, ինչը շատ ավելի վտանգավոր է: Այսօրվա դրությամբ իմ դեմ հարուցված մեկ քրեական գործ և երեք վարչական վարույթ կա: Իսկ ոստիկանական բաժանմունք ինձ տանելու ընթացքում ոստիկանական մեքենայում իմ հասցեին հնչել են ամենալկտի հայհոյանքներ, փորձ է արվել ինձ խեղդելու: Մինչդեռ ոստիկանությունը պնդում է, որ հայհոյողը ես եմ, ինչն ուղղակի աբսուրդ է: Ակնհայտորեն իմ անձի նկատմամբ քաղաքական հետապնդում է իրականացվում` կապված իմ հասարակական և մասնագիտական գործունեության հետ: Հայաստանում նման պատվեր կարող է կայացվել միմիայն ռեժիմի կողմից: Ես այսօր չեմ կարող վստահություն ունենալ, որ Երևանի կամ հանրապետության մեկ այլ քաղաքի փողոցներով քայլելիս ինձ չի մոտենա կրիմինալի մի թափթփուկ և ես չեմ ենթարկվի նրա ապօրինի գործողություններին: Միաժամանակ, չեմ պատրաստվում թիկնապահ վարձել կամ անձիս պաշտպանության նպատակներով դիմել ոստիկանությանը: Ոստիկանությունն ինքն է իմ հանդեպ հետապնդումներ իրականացնում, ես ինչպե՞ս իմ անվտանգության ապահովման հարցով դիմեմ ոստիկանությունը: Կոմիտաս հինգի իրադարձությունները ուղղակիորեն ցույց են տալիս ոստիկանության իրական դեմքը: Մենք մոտ ժամանակներս ականատես ենք լինելու առավել ուժեղ ռեպրեսիաների: Մանավանդ, Մաքսային միությանն անդամակցելուց հետո Հայաստանը կրկնելու է այդ կառույցի իր գործընկեր Ռուսաստանի ռեպրեսիվ գործողությունները »,- ասաց Արգիշտի Կիվիրյանը:
Armenia Today կայքի խմբագրի խոսքով՝ վերջին շրջանում բերման ենթարկված մոտ հարյուր ակտիվիստներին ոստիկանական բաժանմունքներ ուղեկցելիս կիրառվել են բռնություններ, նվաստացումներ ու սպառնալիքներ: «Հայաստանում քաղաքական կոլապս է: Հետևապես մարդիկ իրենց իրավունքները իրացնելու համար դիմում են քաղաքացիական ինքնապաշտպանության: Նրանք կա՛մ պետք է նման քայլի դիմեն, կա՛մ ուղղակի պետք է արտագաղթեն: Բայց ես միշտ ՀՀ քաղաքացիներին հորդորում եմ չլքել երկիրը, քանի որ Հայաստանը մի խումբ մարդկանց սեփականություն չէ, այլ մեզանից յուրաքանչյուրինը»։
Ասուլիսի մյուս բանախոս, փաստաբան Լուսինե Սահակյանն էլ նշեց, որ Կիվիրյանի նկատմամբ երեք վարչական վարույթներն էլ խախտումներով են իրականացվել, վերջինիս հանդեպ բազմաթիվ բռնություններ են կիրառվել: «Առանձին բռնությունները սկսվել են օգոստոսի մեկից, այնինչ մինչ այժմ քրեական գործ չի հարուցվել: Ես ինքս էլ, որպես իրավաբան, տեսնում եմ, որ Արգիշտի Կիվիրյանի հանդեպ հետապնդումներ են իրականացվում: Եվ եթե հայաստանյան ատյանները սպառելուց հետո արդարադատության կայացման, այնուամենայնիվ, չհասնենք, անպայման դիմելու ենք Եվրադատարան: Իսկ Արգիշտի Կիվիրյանի հանդեպ նման հետապնդումները հետևանքն են այն բանի, որ նրա հանդեպ մահափորձ կատարվելու գործն այդպես էլ անհետևանք մնաց, մեղավորներն ազատ արձակվեցին: Հենց սա էլ պատճառ հանդիսացավ նրա հանդեպ նոր հետապնդումների»։
Լուսանկարը՝ PanARMENIAN Photo-ի
