ԵՄ արտգործնախարարների ոչ պաշտոնական հանդիպման մասնակիցները Վիլնյուսում սեպտեմբերի 6-7-ին կքննարկեն 2013-ի դեկտեմբերին ԵՄ խորհրդի հանդիպման նախապատրաստությանն առնչվող հարցեր: Դեկտեմբերին կայանալիք հանդիպումը նվիրված կլինի պաշտպանական հարցերին: Այս մասին հայտնում է RIA Novosti-ն՝ հղում անելով Լիտվայի ԱԳՆ-ին:
Նման հանդիպումներում խիստ օրակարգ չի լինում, իսկ թե որ հարցը կդառնա առաջնային՝ կախված է նախարարներից, ովքեր սովորաբար քննարկում են ամենաակտուալ միջազգային հարցերը: Անկասկած, Վիլնյուսում կխոսվի նաև Սիրիայի ու Եգիպտոսի, Պաղեստինի հետ Իսրայելի բանակցությունների մասին: Նախարարները կքննարկեն Արևելյան գործընկերության և ԵՄ հարավային հարևանության ակտուալ հարցերը:
Այսօր օրվա կեսից մինչև շաբաթ օրվա կեսը դռնփակ հանդիպմանը կմասնակցեն միայն նախարարները՝ առանց ուղեկցող անձանց:
Հանդիպումը կնախագահի ԵՄ արտաքին քաղաքականության և անվտանգության հարցերով գերագույն ներկայացուցիչ Քեթրին Էշթոնը:
Շաբաթ օրը քննարկումներին կմիանա ԱՄՆ պետքարտուղար Ջոն Քերին՝ հայտնում է Լիտվայի ԱԳՆ-ն:
Հանդիպմանն ուշադրություն կդարձվի նաև Ուկրաինային: Մինչ օրս հայտնի չէ՝ կհասցնի՞ այդ երկիրը մինչ նոյեմբերի վերջին Վիլնյուսում կայանալիք Արևելյան գործընկերության գագաթնաժողովի մեկնարկն ավարտին հասցնել բոլոր անհրաժեշտ բարեփոխումները, լուծել նախկին վարչապետ Յուլյա Տիմոշենկոյի բանտարկության հարցը, որպեսզի ստորագրի ԵՄ-ի հետ Ասոցացման համաձայնագիրը:
