Ասոցացման համաձայնագրի ստորագրումը առանց Խորը և համապարփակ ազատ առևտրի պայմանագրի ստորագրման անիմաստ է, «Ազատություն» ռադիոկայանի հետ զրույցում այսօր ասել է Արևելյան գործընկերության քաղաքացիական պլատֆորմի ազգային համակարգող Բորիս Նավասարդյանը:
Երեկ Հայաստանի նախագահի աշխատակազմի ղեկավարն «Ազատություն» ռադիոկայանին տված հարցազրույցում ասել էր, թե քանի որ Հայաստանի անդամակցությունը Մաքսային միությանը թույլ չի տալիս Եվրամիության հետ ստորագրել ազատ առևտրի պայմանագիր, Հայաստանը պատրաստ է ստորագրել միայն Ասոցացման համաձայնագիրը, որը թույլ կտա բարեփոխումների միջոցով արդիականացնել երկիրը:
Մինչդեռ, Բորիս Նավասարդյանի փոխանցմամբ, Ասոցացման համաձայնագրի ամբողջ հիմքը հենց առևտրային հարաբերություններն են, որոնք հանելու դեպքում փաստաթղթի կարգավիճակը այնքան է իջնում, որ այն դժվար է Ասոցացման համաձայնագիր կոչել:
Ազգային պլատֆորմի համակարգողը հիշեցնում է, որ Հայաստանից առաջ Եվրամիությանը նման առաջարկ էր ներկայացրել նաև Ուկրաինան, որը կտրականապես մերժվել էր: Թե ինչպիսի՞ որոշում կկայացնի Եվրամիությունը Հայաստանի դեպքում, դժվար է ասել, սակայն, Նավասարդյանի փոխանցմամբ, շատ ավելի կարևոր է, թե արդյոք առանց ազատ առևտրի գոտու պայմանագրի Ասոցացման համաձայնագրի ստորագրումը բխո՞ւմ է Հայաստանի շահերից:
«Ըստ իս, այդպիսի համաձայնագիր Հայաստանի շահերից չի կարող բխել, քանի որ մեր հիմնական խնդիրներից են տնտեսության մենաշնորհը, շուկայի ապօրինի քվոտավորումը և այս գործընթացում պետական մարմինների ապօրինի օգտագործումը՝ նկատի ունեմ մաքսային ծառայություններ, հարկային ծառայություններ և այլն, և մրցակցային դաշտ ձևավորելու նպաստող ամբողջ բովանդակությունը Ասոցացման համաձայնագրի, մենք այնտեղից հանում ենք: Իսկ առանց այդ հարցերի լուծման չի կարելի լուծել ո՛չ մարդու իրավունքների, ո՛չ ժողովրդավարության, ո՛չ կոռուպցիայի խնդիրները: Այնպես որ, եթե իրոք Հայաստանի իշխանությունները հավատարիմ են իրենց խոստումներին և պարտավորություններին՝ իրականացնել Հայաստանում ժողովրդավարական բարեփոխումներ, թող իրականացնեն, ի՞նչ կապ ունի Ասոցացման համաձայնագիրը», – մեկնաբանել է Բորիս Նավասարդյանը:
Պատասխանելով այն հարցին, թե ինչո՞ւ չորս տարի բանակցելուց հետո Հայաստանը որոշեց կորցնել Եվրամիության հետ ազատ առևտրի գոտի ձևավորելու հնարավորությունը և մտնել Մաքսային միություն, արդյո՞ք Մոսկվայի ճնշումներն այդքան հուժկու են եղել, Բորիս Նավասարդյանը պատասխանել է, որ եթե երկրի ներսում լիներ շահերի կոնսենսուս, որ երկրին ձեռնտու է Եվրամիության հետ հարաբերությունների խորացումը, ապա որևէ արտաքին ճնշում չէր կարող վտանգել այդ գործընթացը: Բայց ամբողջ խնդիրն այն է, որ Հայաստանում որոշ շրջանակներ գիտակցել են՝ միանալով ազատ առևտրի պայմանագրին, դրանով իսկ վտանգելու են իրենց սեփական շահերը:
«Դրանք մենաշնորհներ ունեցող անձիք են, դրանք մարդիկ են, որոնք խաբում են սպառողներին և դրա շնորհիվ գերշահույթներ են ձեռք բերում: Այն մարդիկ են, որոնք առաջնային դիրքեր են գրավում նաև մեր առաջատար քաղաքական ուժերում», – հայտարարել է Բորիս Նավասարդյանը:
Նշենք, որ երեկ Հայաստանի նախագահի աշխատակազմի ղեկավարը բավական ուշագրավ հայտարարություն արեց, ասելով, թե Հայաստանը ի սկզբանե ցանկացել է անդամակցել Մաքսային միությանը, պարզապես իրենց ասվել է, որ ընդհանուր սահմանի բացակայությունը լուրջ խոչընդոտ է, լուծումներ գտնելու համար փորձագիտական խմբեր են աշխատել և վերջին փուլում նրանք կարողացել են ներկայացնել այնպիսի լուծումներ, որոնք թույլ են տալիս հաղթահարել այդ բարդությունը և արդյունավետ դարձնել մասնակցությունը Մաքսային միությանը:
Արձագանքելով Վիգեն Սարգսյանի այս հայտարարությանը Բորիս Նավասարդյանն ասել է, թե խիստ կասկածում է, որ նման ուսումնասիրություններ եղել են, հակառակ դեպքում Հայաստանցի պաշտոնյաները դրանց տեղյակ կլինեին, և մի քանի օր առաջ չէին հայտարարի, թե Մաքսային միության հետ ընդհանուր սահմանի բացակայությունը խոչընդոտ է այդ միությանը միանալու համար:
Հիշեցնենք՝ մի քանի օր առաջ նման հայտարարություն էր արել փոխարտգործնախարար Շավարշ Քոչարյանը:
Հետևաբար, ըստ Նավասարդյանի, դրանք զուտ քաղաքական արդարացումներ են:
