Օգոստոսին բրիտանացի լեգենդար երաժիշտ Էլթոն Ջոնը ենթարկվել է կույրաղիքի հեռացման վիրահատության: Չնայած երաժիշտը կրկին բեմ է վերադարձել, նա խոստովանել է, որ լրագրողներին ողջ ճշմարտությունը չի ասել: Նրա առողջական վիճակը շատ ավելի վատ է եղել, քան այդ մասին գրում էին, հաղորդում է Entertainment Wise-ը:
Ավելի վաղ սպասվող վիրահատության պատճառով երգիչը ստիպված է եղել չեղյալ հայտարարել մի շարք ելույթներ: Դուրս գրվելով հիվանդանոցից՝ նա խոստովանել է, որ քիչ էր մնում մահանար վիրահատական սեղանին: Բարդությունների պատճառը գերհոգնածությունն էր:
«Գիտեի, որ հիվանդ եմ, սակայն պատկերացում չեմ ունեցել, որ դա այդքան վտանգավոր է: Ինձ այդ մասին ասացին միայն մանրազնին հետազոտությունից հետո, որին նախորդել էին ինը համերգ, 24 թռիչք և սպորտային խաղեր: Ես կարող էի հեշտությամբ մահանալ»,- հայտարարել է երաժիշտը:
Էլթոն Ջոնի խոսքերով՝ այս նորությունը վերևից ուղարկված յուրատեսակ նշան է դարձել իր համար:
«Ես սնահավատ մարդ եմ և 66 տարեկան եմ, ոչ թե՝ 36: Ես անհրաժեշտություն չունեմ այսքան համերգներ տալու, ինձ գումար հարկավոր չէ: Ցանկանում եմ մյուզիքլ բեմադրել Բրոդվեյի համար և ավելի շատ ժամանակ տրամադրել երեխաներիս: Մնացած ամեն ինչը նշանակություն չունի»,- ասել է երգիչը:
