Մայիսի 26-ին Բուխարեստի Տնտեսագիտական ակադեմիայի Մեծ սրահում տեղի ունեցավ Հայոց ցեղասպանությանը նվիրված գիտաժողով, որին հատուկ հրավիրվել էին ցեղասպանության խոշոր մասնագետներ՝ Մասաչուսեթսի Քլարկ համալսարանի պրոֆեսոր Թաներ Աքչամը (Taner Akcam, Clark University), USA և Փարիզ-VIII Սեն-Դենիի համալսարանի պրոֆեսոր Ռեյմոն/Հարություն Գևորգյանը (Raymond Kevorkian, Université Paris-VIII-Saint-Denis): Գիտաժողովին ներկա էին Ռումինիայի նախկին նախագահ Իոն Իլիեսկուն (Ion Iliescu), ինչպես նաև ռումինական քաղաքական-հասարակական և գիտական շրջանակների ներկայացուցիչներ, հեռուստատեսությունը, մամուլը:
«Հայաստան. Մի ժողովրդի ճակատագիր» խորագրով գիտաժողովը բացեց Ռումինական Ակադեմիայի փոխնախագահ ակադեմիկոս Դան Բերինդեյը (Dan Berindei), հյուրերին ողջունեց և ներկայացրեց սենատոր, Ռումինահայոց միության նախագահ Վարուժան Ոսկանյանը: Պատմաբան, վերջերս անգլերենով լույս տեսած «Հայոց ցեղասպանություն. Ամբողջական պատմություն» (The Armenian Genocide: A Complete History) ստվարածավալ աշխատության հեղինակ Ռեյմոն Գևորգյանը «Հայոց ցեղասպանություն. Ոչնչացում երկու փուլով, 1915-1916» զեկույցում անդրադարձավ հայերի արտաքսման և վերացման երիտթուրքական կառավարության հետևողական քաղաքականությանը: Թուրք պատմաբան Թաներ Աքչամն իր «Ժխտողականությունը որպես ազգային անվտանգության հղացք» զեկույցի մեջ մեկնաբանեց արդի թուրքական կառավարության ժխտողական քաղաքականությունը և դրա բացասական հետևանքները ներքին և արտաքին առումով:
Ռումինիայի նախկին նախագահ Իոն Իլիեսկուն ողջունեց հայ և թուրք պատմաբանների մասնակցությամբ գիտաժողովի նախաձեռնությունը՝ համարելով այն այդ բարդագույն հարցի մեջ փոխհասկացողության կարևոր օղակ:
Նույն օրը կեսօրին Թաներ Աքչամը և Ռեյմոն Գևորգյանը հրավիրվել էին ռումիանականTVR Info հեռուստակայան, ուր մոտ կեսժամանոց ուղիղ հաղորդման մեջ նրանք խոսեցին ցեղասպանության իրականացման, ինչպես նաև հայ-թուրքական հարաբերությունների մասին: Հաղորդումից առաջ ցուցադրվեց հեռուստատեսության պատրաստած փաստագրական նյութ Հայոց ցեղասպանության մասին:
Մայիսի 27-ին Թաներ Աքչամը և Ռեյմոն Գևորգյանը հանդիպում ունեցան Բուխարեստի համալսարանի պատմության ֆակուլտետի դասախոսական կազմի և ուսանողության հետ: Կեսօրից հետո Բուխարեստի Ռումինական գյուղի թանգարանում (Museum of the Romanian Peasant) տեղի ունեցավ Թաներ Աքչամի «Ամոթալի ակտ. Հայոց ցեղասպանությունը և թուրքական պատասխանատվության հարցը» (A Shameful Act: The Armenian Genocide and the Question of the Turkish Responsibility) գրքի ռումիներեն թարգմանության ներկայացումը:
Հայոց ցեղասպանության և թուրքական ժխտողականության վերաբերյալ միջոցառումները կազմակերպվել էին Ռումինահայոց միության և Ռումինահայոց թեմի ջանքերով: