«Ելք» դաշինքն այսօր՝ մարտի 21-ին քարոզարշավ է իրականացնում Մեծ Մանթաշում՝ պատգամավորության թեկնածուներ Էդմոն Մարուքյանի և Արամ Զ. Սարգսյանի գլխավորությամբ:
«Նպատակը, որ այստեղ եկել ենք, բնական է, ընտրություններն են: Այն ինչ-որ ձեզանից լսեցի, երկու գաղափար էր, մեկն այն, որ այս իշխանությունները շատ վատն են, նրանց փոխել է պետք, երկրորդը՝ նրանց փոխելու ճանապարհը տեսնում եք բոլորով միավորվելով:
Այս իշխանություններին փոխելը, դեռ չի նշանակում երկիրը փոխել, որովհետև կարող ես այս իշխանություններին փոխել, բայց փոխվածը գա անի նույնը, ինչ-որ այս իշխանություններն են անում. պետք է իմանաք ում ումով ենք փոխարինում…
Գալիս են այստեղ նույն մեքենաներով, նույն բրենդի հագուստն են հագնում, ձեզ հետ նույն կերպ են վարվում, գալիս փող են առաջարկում, որ իրենց քվե տաք… 2008-ի մարտի 1-ից հետո, երբ մեր ընկերներից 10 մարդ զոհվեց, արթուրբաղդասարյաններով գնացին, ասացին՝ շեֆ ջան, մի երեք մինիստրի պաշտոն էլ մեզ տվեք, քեզ շեֆ ասենք ու ֆռֆռանք: Հիմա դուք ասում եք միացեք իրենց, փոխեք իշխանությունը: Իրենց ու այս իշխանության տարբերությունը ո՞րն է: Որ այս իշխանությունը վատն է, երկիրը հասցրել է ծայրահեղ վիճակի, դա միանշանակ է: Բայց ընտրելն էլ, փոխելն էլ դուք պետք է անեք, ժողովուրդ ջան: Ինչքա՞ն պետք է ընտրություն կատարեք վատի ու վատթարի միջև…»,-այս մասին իր ելույթում ասաց Արամ Զ. Սարգսյանը:
Ա. Սարգսյանի գնահատմամբ, վարչապետ Կարեն Կարապետյանը նշանակվելուց հետո բացի թմբուկ նվագելուց ու կոստյումը այս ու այն աթոռին կախելուց ուրիշ ոչինչ չի արել: Անդրադառնալով վարչապետի այն հայտարարությանը, թե գործարան կառուցելը պետության գործառույթը չէ, Սարգսյանը նշեց. «Ասում է՝ պետությունը պետք է մթնոլորտ ստեղծի, բայց մթնոլորտ ստեղծում է Սուրենյանը, իսկ վարչապետի գործն երկիրը երկիր դարձնելն է, գյուղացու ստեղծածը մթերելն է, աշխատատեղ ստեղծելը»:
Մանրամասները տեսանյութում:
