Ադրբեջանական Salam News գործակալության փոխանցմամբ՝ Ադրբեջանի պետական մաքսային կոմիտեն հրապարակել է այս տարվա առաջին չորս ամիսների արտահանման ցուցանիշները:
Դրանց համաձայն՝ ադրբեջանական ողջ արտահանման 91.11 տոկոսը կազմել են նավթն ու նավթամթերքը: Ընդ որում, ողջ արտահանման 85.39 տոկոսը կազմել է հում նավթը, իսկ 5.72 տոկոսը՝ նավթամթերքը:
2010 թվականին նավթի ու նավթամթերքի մասնաբաժինն ադրբեջանական արտահանման մեջ կազմել է 92.55 տոկոս: Ընդ որում, հում նավթի մասնաբաժինը կազմել էր 86.53 տոկոս, իսկ նավթամթերքինը՝ 6.02 տոկոս:
2009 թվականի համեմատ, նավթի արտահանումն աճել է 53.91 տոկոսով, իսկ նավթամթերքի արտահանումը կրճատվել է 13.41 տոկոսով:
Հիշեցնենք, որ ապրիլի կեսերին Ադրբեջանի պետական նավթային ընկերությունը (SOCAR) հայտարարեց, որ ցայժմ Ադրբեջանը համաշխարհային շուկաներ է առաքել 255 միլիոն տոննա նավթ և 22.2 միլիարդ խորանարդ մետր բնական գազ: Ադրբեջանի նավթային պաշարները գնահատվում են 30 միլիարդ բարել (1 բարելը հավասար է 159 լիտրի), իսկ գազային պաշարները՝ 5-6 տրիլիոն խորանարդ մետր:
Իսկ մայիսի կեսերին բրիտանական The Economist պարբերականը գրել էր. «Նավթային եկամուտները կազմում են Ադրբեջանի ՀՆԱ-ի 55 տոկոսը, սակայն դա չի կարող հավերժ տևել: Նավթի արտադրությունն Ադրբեջանում հասել է առավելագույն մակարդակի: Որոշ գնահատականներով, Ադրբեջանի նավթային պաշարները սպառվելու են 2028 թվականին»:
