ՀՀԿ-ական պատգամավոր Ռաֆիկ Պետրոսյանն այսօր լրագրողների հետ հանդիպման ժամանակ հայտարարեց, որ քրեակատարողական հիմնարկների աշխատակիցները, օգտագործելով համաներման փաստը, փորձել են բանտարկյալներից գումարներ վերցնել վերջիններիս տույժերը թեթևացնելու համար:
Նա շեշտեց, որ իրենք իմացել են այդ մասին և համապատասխան միջոցներ են ձեռնարկել. «Ինձ թվում է, դրանից հետո ՔԿՀ-ի ոչ մի աշխատող ռիսկ չի անի՝ իմանալով, որ գտնվում է ԱԱԾ-ի հսկողության տակ»:
Ընդհանուր առմամբ, գնահատելով համաներման փաստը՝ Պետրոսյանն ասաց, որ թեև ընդդիմությունը սա համարում է իր հաղթանակը, ՀՀԿ-ն էլ կարծում է, որ սա հաղթանակի հարց չէ, այլ երկրի առջև կանգնած որոշ խնդիրների լուծմանը նպաստող միջոցառում:
«Ընդդիմությունն այն ժամանակ էլ չէր հաղթել, երբ 2009 թ. համաներում արվեց, երբ ստեղծվեց նախագահին կից Հանրային խորհուրդը: Իհարկե, ընդդիմությանն ընդառաջ գնալու հարցն էլ կա, սակայն դա հիմնականը չէ»,- մանրամասնեց Պետրոսյանը և հավելեց, որ ՔԿՀ-ներում տեղի խնդիր կա, և այս համաներմամբ այդ հաստատությունները կթեթևանան:
ՆԺԿ առաջնորդ Արամ Կարապետյանն էլ նկատեց, որ համաներումը ողջունելի փաստ է, սակայն դա որևէ մեկի հաղթանակը չէ. «Երբ անմեղ մարդուն ձերբակալում են, այնուհետև ազատ արձակում, դա հաղթանակ չի կարելի անվանել:
Համաներումն այսօր ավելի շատ ներկայացվում է որպես քաղաքական կատեգորիա, քան իրավական: Ամեն դեպքում, ես շատ ուրախ եմ, որ իմ քաղբանտարկյալ ընկերները ազատության մեջ են լինելու»:
Կարապետյանը կարծիք հայտնեց, որ համաներումն հիմա է արվում, քանզի իշխանությունը խնդիր ունի քաղաքական իրավիճակը հարթելու։