«Առաջին լրատվական»-ը երեկ տեղեկացրել էր, որ Վրաստանի ՆԳՆ-ը հրապարակել է վրացական ընդդիմության լիդերներից խորհրդարանի նախկին խոսնակ Նինո Բուրջանաձեի և նրա որդու Անզոր Բիցաձեի հեռախոսային խոսակցության ձայնագրությունը, որում նրանք քննարկում են Վրաստանում քաղաքացիական պատերազմ սանձազերծելու մանրամասները:
Ռուսական Newsru.com կայքը ներկայացրել է նրանց ամբողջ խոսակցությունը, որում ասվում է հետևյալը.
«Վրաստանում քաղաքացիական պատերազմ սանձազերծելու հարցում Բուրջանաձեն և նրա որդին համաձայնության են եկել, որ առավել նախապատվելի տարբերակը եգիպտական սցենարն է, և որ իրենց պլանների իրագործման համար ցանկալի է 100-500 զոհերի գրանցում:
Զրուցակիցները հանգել են այն եզրակացության, որ Ռուսաստանի հանդեպ ունեցած դիրքորոշման հարցում վրացիները բաժանված են գրեթե հավասարաչափ: Նույնը կարելի է ասել նաև գործող նախագահ Միխեիլ Սաակաշվիլիի պարագայում:
Բուրջանաձեի ու նրա որդու հաշվարկներով` ընդդիմության բողոքի ակցիաներին պետք է մասնակցեր մոտ 30,000 մարդ: Բուրջանաձեն անգամ նշել է, որ ընդդիմության ցույցերին կարող է մասնակցել մինչև 70,000 մարդ:
Բանակի միջամտության հարցում Անզոր Բիցաձեն մորը վստահեցրել է, որ բանակը թույլ է, իսկ հատուկ նշանակության Կոջորի գումարտակը հազիվ թե գնա ցուցարարների վրա կրակ բացելուն, իսկ եթե դա տեղի ունենա, ապա առաջին իսկ կրակոցի դեպքում նա գործ կունենա ՌԴ Գլխավոր հետախուզական վարչության (ԳՀՎ) հատուկջոկատայինների հետ»:
Ի դեպ, Վրաստանի նախկին օմբուդսմեն, իսկ ներկայոմս ընդդիմադիր «Վրացական կուսակցության» առաջնորդներից Սոզար Սուբարին հայտարարել է, որ պետք է հետաքննություն սկսել այդ աուդիո ձայնագրության հավաստիությունը պարզելու համար` իշխանություններին մեղադրելով այն նախապես չհրապարակելու մեջ:
Հիշեցնենք, որ երեկ Վրաստանի անկախությանը նվիրված ռազմական շքերթի ժամանակ Միխեիլ Սաակաշվիլին հայտարարել է, որ ընդդիմությունը ցանկանում էր ոչ թե խոսքի ազատություն, այլ բռնություն և զոհեր, և երբ նրանք չհասան իրենց նպատակին ու չունեցան անհրաժեշտ զոհեր, նրանց առաջնորդներն իրենց ավտոմեքենաներով վրաերթի ենթարկեցին երկու անձանց: