Ինչպես տեղեկացրին ՀՀ ոստիկանության հասարակայնության հետ կապերի և լրատվության վարչությունից, պարզաբանման մեջ նշված է. «Ընտրական գործընթացի շրջանակներում ՀՀ ոստիկանությունը գործել է և շարունակում է գործել թափանցիկ, տեղեկատվություն տրամադրելու վերաբերյալ բոլոր հարցումներին տվել է սպառիչ պատասխան: Հաշվառումների քանակական համեմատության վերաբերյալ հարցում է կատարել Նիկոլ Փաշինյանը, Էդմոն Մարուքյանը, տարբեր լրատվական ծառայություններ և այլ իրավասու անձինք:
Տիկին Բիշարյանի կողմից պահանջվում է շաբաթը մեկ պարբերականությամբ հրապարակել բոլոր անձնագրային ծառայությունների կողմից իրականացրած հաշվառումները: Անձնագրային և վիզաների վարչությունը, ինչպես նաև անձնագրային ծառայությունները այս օրերին աշխատում են գերծանրաբեռված ռեժիմով:
Աշխատանքներ են տարվում ընտրողների ցուցակները հրապարակելու, դրանք ճշգրտելու, յուրաքանչյուր 10 օրը մեկ պարբերականությամբ ընտրողների թիվը հրապարակելու համար ամբողջական ռեգիստր ներբեռնելու ուղղությամբ և այլն: Այս ամենը կազմակերպելու համար կարելի է ասել ծառայություններն աշխատում են ժամացույցի ճշգրտությամբ, ՀՀ ընտրական օրենսգրքով սահմանված միջոցառումները ժամանակին ապահովելու համար:
Իսկ ամբողջ հանրապետության հաշվառումների թվային վերլուծության հրապարակման համար կխաթարվի ընտրական գործընթացը ՀՀ ոստիկանության մասով՝ ընտրողների ռեգիստրի պատշաճ կարգով վարելու առումով:
Այս ընտրություններին կազմավորվել են 1997 ընտրական տեղամասեր (չհաշված քրեակատարողական հիմնարկներինը): Թվային վերլուծությունը իրենից ենթադրելու է 2016 և 2017թթ. համապատասխան ժամանակահատվածի համար ամբողջ տեղամասերում իրականացված հաշվառումների վերհանում, տարբեր կատեգորիաների առանձնացում (զորացրվելու կապակցությամբ է հաշվառվել, թե ոչ, որպես սեփականատեր, սեփականտիրոջ համաձայնությամբ, թե փաստացի բնակության հիմքով, տվյալ համայնքում է հասցեափոխությունը, թե այլ մարզից և այլն)»: