«Առաջին լրատվական»-ի զրուցակիցն է Ուկրաինայում ՀՀ արտակարգ և լիազոր դեսպան Անդրանիկ Մանուկյանը:
https://www.youtube.com/watch?v=t_wI5dEueIA
– Պարոն Մանուկյան, օրերս ԱԳՆ-ում վարչապետ Կարեն Կարապետյանի հետ դեսպանների հանդիպմանը ներկա էիք նաև Դուք, որտեղ էլ նշեցիք, որ վարչապետի խոսքը լսելով՝ ուզում եք հենց հիմա ներդրում անել Հայաստանում: Մի՞թե կարծում եք՝ կոչերին սփյուռքահայերն ականջալուր կլինեն և կշտապեն ներդրումներ անել:
– Պետք է մի բան անկեղծորեն ընդգծեմ՝ վարչապետն իսկապես մեծ հավատ է ներշնչում, և մարդիկ իսկապես իրեն հավատում են: Ներդրողի համար ամենակարևորն այն է, որ պայմաններ ստեղծվեն ներդրումների համար: Ինչ հոգեբանություն ունի ներդրողը, երբ որոշում է ներդրում կատարել. առաջին հերթին ինքը պետք է համոզված լինի, որ այդ ներդրումներն ապահովված են, և ինքը կորուստներ չի ունենա երկրում, որտեղ ինքը ներդրում է անելու, իր հանդեպ կլինի բարյացակամ վերաբերմունք: Ես ինչու վարչապետի հետ հանդիպմանն այդպես ասացի, որովհետև վարչապետն իսկապես շատ լավ ներկայացրեց, թե ինչպիսի պայմաններ են ստեղծում արտասահմանյան ներդրողների համար: Ես պարզապես ասացի, որ ձեր խոսքը պետք է փոխանցվի, որովհետև դուք այստեղ ասում եք, դրսում չգիտեն ձեր ասածների մասին, և եթե մարդիկ իմանան, որ իսկապես փոխվել է մթնոլորտը Հայաստանում, ներդրողները վստահաբար կգան Հայաստան: Ես Կարեն Կարապետյանին շատ վաղուց եմ ճանաչում: Նա իր խոսքի տեր անձնավորություն է և իզուր տեղը որևէ բան չի ասի: Նա իսկապես հավատ է ներշնչում:
– Պարոն Մանուկյան, արդյոք տեղյա՞կ չեք, թե քանի սփյուռքահայ է Հայաստանում ձախողել, դիմել դատարաններ, սակայն մնացել անպաշտպան: Դատարաններում այսօր տասնյակ գործեր կան:
– Ընդհանրապես ժամանակները փոխվում են, փոխվում է նաև մարդկանց հոգեբանությունը: Վստահ եմ, որ երբ այս վարչապետը խոստումներ է տալիս, իր խոստման տեր մարդ է, կյանքի է կոչում, և ես նրան հավատում եմ: Իսկապես Հայաստանում ներդրողների թիվը գնալով ավելանում է, և դա շատ դրական երևույթ է:
– Ցույց տվեք մեկ ներդրողի, որ վարչապետի հայտարարությունից հետո շտապել է Հայաստան՝ ներդրումներ անելու: Որևէ վստահություն չկա:
– Ներդրողները միանգամից չեն կարող հայտնվել: Մարդը ընդամենը վեց ամիս է՝ վարչապետ է, ներդրողը միանգամից չի գալիս ներդրում անելու: Արտաքին ներդրողը ուսումնասիրում է, տեսնում, թե ինչ փոփոխություններ են կատարվում, հետո նոր որոշում է ներդրումներ անել: Եվ ես համոզված եմ, որ ներդրողները կգան Հայաստան: Իսկապես, վարչապետ Կարեն Կարապետյանի խոսքը հավատ է ներշնչում ներդրողների մոտ: Առաջին հերթին ներդողի համար վստահության մթնոլորտ պետք է ստեղծվի, և բոլոր ընտրողների համար դա չափանիշ է:
– Այս խորհրդարանական ընտրություններին ի՞նչ մասնակցություն կունենաք:
– Ես ընտրություններին չեմ մասնակցում: Ես հիմա Կիևում եմ:
– Սակայն Ձեր որդին առաջադրվել է «Ծառուկյան» դաշինքով Կոտայքի մարզից:
– Իհարկե, իմ որդին առաջադրվել է, բայց ինչպես տեսնում եք՝ ես Կիևում եմ:
– Առաջադրվել է մի ուժի կողմից, որն ասում է, թե իշխանափոխության է գնում, մինչդեռ Դուք Կարեն Կարապետյանին եք գովեստի խոսքեր շնորհում:
– Ընտրությունների հետ կապված, խնդրում եմ, ինձ որևէ հարց մի տվեք: Եթե կան դեսպանատան աշխատանքների հետ կապված հարցեր, խնդրեմ:
