Արցախի Հանրապետության Նախագահ Բակո Սահակյանը մայիսի 26-ին մասնակցել է Շուշի քաղաքում «Հայաստան» համահայկական հիմնադրամի միջոցներով կառուցված Ղազանչեցոց փողոցի և Շուշիի կենտրոնական գրադարանի նորակառույց շենքի բացման հանդիսավոր արարողություններին:
Երկրի ղեկավարը երախտագիտություն է հայտնել «Հայաստան» համահայկական հիմնադրամին Շուշիում վերականգնողական աշխատանքներ իրականացնելու համար, ընդգծելով, որ քաղաքի զարգացման ամենահուսալի հիմքը հանդիսանում է հենց համայն հայության ուժերի համախմբումն ու այստեղ համատեղ ծրագրերի իրականացումը:
Արարողություններին մասնակցում էին Հայ Առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը, Ազգային ժողովի փոխխոսնակ Արթուր Թովմասյանը, փոխվարչապետ Սպարտակ Թևոսյանը, կառավարության անդամներ, «Հայաստան» համահայկական հիմնադրամի գործադիր տնօրեն Արա Վարդանյանը, հյուրեր սփյուռքից: