Հինգ երկրների ռեժիսորները, ովքեր ներկայացնում են «Օսկարի» առաջադրված օտարերկրյա ֆիլմերը, կոչ են արել դադարեցնել աշխարհում ազգայնականության բորբոքումը, այդ թվում առանձին քաղաքական գործիչների կողմից։ Իրենց նամակում Իրանի, Շվեդիայի, Գերմանիայի, Դանիայի և Ավստրալիայի ռեժիսորները հայտարարել են, որ նվիրում են «Օտարալեզու լավագույն ֆիլմ» անվանակարգում իրենց ապագա մրցանակը միասնականությանն ու խոսքի ազատությանը։ Այս մասին հայտնում է TASS գործակալությունը։
Նրանց խոսքով՝ անկախ նրանից, թե ով կհաղթի կիրակի, իրենք հրաժարվում են մտածել ազգային սահմանների կատերգորիաներում։
«Մենք նվիրում ենք այդ մրցանակը բոլոր մարդկանց՝ դերասաններին, լրագրողներին և ակտիվիստներին, ովքեր աշխատում են՝ նպաստելու միասնականությանն ու ըմբռնմանը, նրանց, ովքեր աջակցում են խոսքի ազատությանն ու մարդկային արժանապատվությանը՝ արժեքներ, որոնց պաշտպանությունն ավելի քան երբևէ կարևոր է»,-ասվում է հայտարարությունում։
