ԱԺ ՀՀԿ խմբակցության պատգամավոր Կարինե Աճեմյանի գնահատմամբ, Սերժ Սարգսյանի կողմից առաջարկված համաներումը մարդասիրական քայլ է, որը կմեղմի հասարակական և ներքաղաքական լարվածությունը, ինչպես նաև կթեթևանան քրեակատարողական հիմնարկները:
«Սա հումանիստական, մարդասիրական քայլ է։ Ներում են ուժեղները, մարդիկ, ովքեր վստահ են իրենց ուժերի վրա ու մեծահոգի են, և հասարակությունը շատ դրական գնահատական է տալիս այս համաներմանը»,- լրագրողների հետ հանդիպման ժամանակ ասաց Աճեմյանը:
Նա նաև նկատեց, որ օրենսդրական դաշտն այդ առումով կատարյալ չէր, և վերջերս ԱԺ-ի կողմից ընդունված Քրեական օրենսգրքում բարեփոխումներ կատարելու վերաբերյալ օրինագիծը պարարտ հող էր ստեղծել համաներման համար:
«Ժառանգություն» խմբակցության պատգամավոր Զարուհի Փոստանջյանն էլ նկատեց, որ համաներում հաճախ հայտարարելը նրանից չէ, որ ՀՀ իշխանությունները հումանիստ են և իրապես ցանկանում են հասարակության համար բարիք գործել, այլ իրականում «սա շատ վատ օրից է գալիս»:
Փոստանջյանը հիշեցրեց, որ հայաստանյան քրեակատարողական հիմնարկների ծանրաբեռնված վիճակի հիմնական պատճառն այն է, որ 2006 թ. նախագահի հանձնարարականով ստեղծվել է մի հանձնաժողով, որն արհեստականորեն խոչընդոտում է մարդկանց պայմանական վաղաժամկետ ազատ արձակվելու իրավունքը: Նա նկատեց, որ անընդհատ համաներում հայտարարելը ավտորիտար ռեժիմին բնորոշ երևույթ է. «Երբ դու չես կարողանում հարցերը լուծել ժամանակին, ստիպված ես լինում դիմել այսպիսի քայլերի, որ պայթյուն տեղի չունենա»:
Փոստանջյանը համաձայնեց, որ համաներումը որոշակիորեն կթուլացնի լարվածությունը, սակայն դա դեռ չի նշանակում, որ համաներմամբ հնարավոր կլինի լուծել խնդիրները. «Այս համաներումը խոսում է այն մասին, որ տարիներով շարունակվող անարդարությունները հանգեցրել են այս իրավիճակին, երբ պետք է ինչ-որ բան անել»:
