ԱԺ ՀՀԿ խմբակցության պատգամավոր Մկրտիչ Մինասյանն, ամփոփելով արտաքին և ներքին քաղաքական ամառը, հայտարարեց, որ հակասական բաներ կային Ադրբեջան ՌԴ նախագահի այցի մեջ: Մկրտիչ Մինասյանի կարծիքով` այդ հակասական վերաբերմունքի արդյունքն ու զարգացումները դեռ կտեսնենք:
«Հայի ազգանունով ռուս լրագրողին չթողնելն Ադրբեջան կամ հայկական ծագում ունեցող արտաքին գործերի նախարարի նկատմամբ, այսպես կոչված, «պատահական» անհարգալից, հայհոյանքի վերածվող վերաբերմունքը պատահական չէր և չէր կարող պատահական լինել»,- նշեց ԱԺ ՀՀԿ խմբակցության պատգամավորը:
Ինչ վերաբերում է Ադրբեջանի նախագահի կողմից հրապարակված թվերին, Մկրտիչ Մինասյանի կարծիքով` դա իր ֆինանսական հզորությունը ցույց տալու քաղաքական նկատառումներով արվեց, ինչպես նաև՝ ռուս-ադրբեջանական քաղաքական հարաբերությունների ծավալը ցույց տալու համար, որը, ըստ բանախոսի, «խորհելու տեղիք է տալիս»:
«Այնտեղ, փաստորեն, սպասվում էր, որ շատ ավելի լայն քննարկում պետք է իրականացվեր ղարաբաղյան հարցի շուրջ, բայց, կարծում եմ՝ Պուտինի կարճ ու հստակ արտահայտությունը, որ այն միայն քաղաքական ճանապարհով պիտի լուծվի, սա շատ լակոնիկ, բայց տարողունակ մոտեցում էր: Դրանից պիտի հետևություն անել, որ Ռուսաստանի դիրքորոշումն այս հարցում շատ կոշտ է, և ՌԴ-ի շահերն այս տարածաշրջանում չեն փոխվել»,- ասաց ՀՀԿ խմբակցության պատգամավորը:
Նա կարծում է, որ այս իմաստով չպետք է զարմանալ, թե ինչ ծավալների զենք վաճառվեց Ադրբեջանին։ Մկրտիչ Մինասյանի խոսքերով` «ուրիշներն էլ ապացուցել են, թե այդ զենքն ինչ զենք է, բողոքներ կան զենքի որակի մասին և այլն, դա այլ հարց է և չպետք է մոռանալ, որ մենք այդ զենքին համապատասխան հակադարձող զենքն էլ, զինամթերքն էլ ունենք»:
Հայ ռազմագերի Հակոբ Ինջիղուլյանի խնդրին անդրադառնալով` Մկրտիչ Մինասյանն ասաց, որ մարդու իրավունքները պաշտպանող կազմակերպություններն ամեն դատարկ բանի համար կարող են ձայն բարձրացնել, բայց մարդու իրավունքների այսպիսի խախտման դեպքում լռում են: Մկրտիչ Մինասյանը դատապարտում է միջազգային կազմակերպություններին և կարծում է, որ երկակի ստանդարտներով են գործում:
Լուսանկարը` PanARMENIAN Photo-ի
