Այս տարվա առաջին 7 ամիսներին գները բարձրացել են 4.7 տոկոսով (անցած տարվա առաջին 7 ամիսների համեմատ): Նույն ժամանակում միջին ամսական անվանական աշխատավարձը նույնպես ավելացել է՝ 3.2 տոկոսով, այսինքն՝ 1.5 տոկոսով ավելի դանդաղ, քան գնաճը: Ինչը նշանակում է, որ չնայած միջին ամսական անվանական աշխատավարձի աճին, իրականում աշխատավարձը ոչ թե աճել, այլ նվազել է: Սա ավելի հստակ կերևար, եթե Ազգային վիճակագրական ծառայությունը հրապարակեր նաև միջին ամսական իրական աշխատավարձի աճի դինամիկան, որը չի հրապարկում:
Ի դեպ, պետք է ուշադրություն դարձնել այն միտմանը, որ ամսեամիս գները սկսում են ավելի արագ վազել, քան աշխատավարձը: Ընդամենը մեկ ամիս առաջ՝ հունվար-հունիսին՝ գնաճն աշխատավարձից առաջ էր ընկնում 1.4 տոկոսով (2012թ.-ի հունվար-հունիսի համեմատ գնաճը՝ 4.1%, միջին ամսական անվանական աշխատավարձի աճը՝ 2.7%), իսկ հունվար-հուլիսին՝ գնաճն աշխատավարձից առաջ է ընկնում արդեն 1.5 տոկոսով, ինչը նշանակում է որ իրական աշխատավարձն ամսեամսի սկսում է ավելի ու ավելի արագ նվազել:
