Վրացական GHN լրատվական գործակալության փոխանցմամբ, Վրաստանի նախագահ Միխեիլ Սաակաշվիլին ուկրաինական հեռուստաալիքներին տված հարցազրույցի ժամանակ հերթական անգամ անդրադարձ է կատարել այն խնդրին, թե 2008 թվականին ով է սկսել պատերազմը.
«Ռուսաստանը մեզ հաճախ մեղադրում է 2008 թվականին պատերազմ սանձազերծելու մեջ: Սակայն բոլորը գիտեն, որ դա այդպես չէ: Մենք չենք հարձակվել խաղաղ քնած Ցխինվալի վրա: Ռուսաստանը երկար ժամանակ էր պատրաստվել դրան:
Մենք ինքնասպաններ չենք և բնականաբար չէինք ցանկանում հակամարտության մեջ մտնել Ռուսաստանի հետ: Մենք արել ենք ամեն ինչ, որպեսզի խուսափենք դրանից: Սակայն նրանք դա վաղօրոք էին պլանավորել: Պուտինը բազմիցս հայտարարել է, որ այդ պատերազմն անխուսափելի է:
Դժբախտաբար, Վրաստանի տարածքի 20 տոկոսը ցայժմ մնում է օկուպացված: Դա իմ տերմինը չէ, Եվրախորհրդարանի, ԱՄՆ-ի ու մյուս երկրների տերմինն է: Յուրաքանչյուր օկուպացիա երբևէ ավարտվում է: Գլխավորը երկրի հետագա զարգացումն է: Այս տարի զարգացման տեմպերով Վրաստանը գերազանցում է Ռուսաստանին»:
Հիշեցնենք, որ 2008 թվականի ռուս-վրացական հնգօրյա պատերազմը տեղի է ունեցել օգոստոսի 7-12-ը:
