ԱՄՆ նախագահ Դոնալդ Թրամփը հինգշաբթի օրը ԴԱԻՇ ահաբեկչական խմբավորման զինյալների բռնությունը քրիստոնյաների նկատմամբ անվանել է ցեղասպանություն, հայտնում է RIA Novosti-ն:
Ելույթ ունենալով Ազգային աղոթքի նախաճաշին Վաշինգտոնում, նա նշել է, որ լուրջ հետապնդումների են ենթարկվում մուսուլմանները և հրեաները: «Դավանանքի ազատությունը սուրբ իրավունք է, սակայն այժմ այդ իրավունքը սպառնալիքի տակ է, ինչպես նաև ողջ աշխարհն է գտնվում շատ լուրջ սպառնալիքի տակ»,- ասել է Թրամփը:
«Մենք տեսնում ենք ոչնչացման սպառնալիքներ հրեաների նկատմամբ: Եվ մենք տեսնում ենք ԴԱԻՇ-ի կողմից ցեղասպանության արշավ քրիստոնյաների նկատմամբ, երբ զինյալները մարդկանց գլխատում են»,- նշել է նա և ավելացրել, որ «բոլոր երկրները բարոյական պարտավորություն ունեն դա դադարեցնելու»: Նրա խոսքերով՝ «բոլոր երկրները պարտավոր են համագործակցել այն բանի համար, որ հակազդեն նման իրադրությանը»:
