Կրթության և գիտության նախարար Արմեն Աշոտյանը այսօր կառավարության մամլո կենտրոնում լրագրողների հետ հանդիպման ընթացքում ներկայացրեց «Կայուն դպրոցական սնունդ» ծրագիրը:
Նրա խոսքով՝ դա կայուն համակարգ է, որը թույլ կտա բազմաթիվ խնդիրներ լուծել. «Ճիշտ սնված երեխան ավելի ընկալունակ է, համապատասխան ու վիտամիններով հարուստ սնունդ ստացած երեխաներն ավելի ընկալունակ են դառնում»:
Արմեն Աշոտյանի խոսքով՝ առաջին հերթին առողջապահական խնդիրներ են լուծվում, ծրագիրը նաև աղքատության դեմ պայքարի ուղղություններից մեկն է. «Այս ծրագրի իրականացումը մի քանի շերտ ունի, բացի պետական պարտավորություններից՝ իր մեջ ներառում է համագործակցության դաշտ միջազգային դոնորների, համայնքների և ծնողների միջև»:
ԼԳ նախարարը հավելեց, որ ծրագիրը տարածվելու է տարրական դասարանների աշակերտների վրա. «Ծրագիրը կմեկնարկի 2014 թվականին՝ Վայոց ձորի մարզից, հետո կտարածվի Արարատի, Սյունիքի մարզերում, հետո կընդգրկի մնացած մարզերն ու Երևանը:
Միանվագ սնունդ է լինելու, սնունդը ստանալու են դասերի ընթացքում: Երեխայի տարիքից ելնելով՝ հաշվարկվել է օրական երկու հարյուր միլիլիտր կաթ կամ յոգուրդ, կամ մածուն, կամ հյութ կամ կակաո, գումարած՝ հիսուն գրամ թխվածքաբլիթ, բուլկեղեն, այսինքն՝ միատեսակ չի լինելու: Այնտեղ, որտեղ հնարավոր կլինի նաև պայմաններ ստեղծել տաք սնունդ տալու համար, կլինի նաև տաք սնունդ>>:
Նա նաև նշեց, որ իրենք ծրագրի շրջանակներում համագործակցելու են Ռուսաստանի Դաշնության հետ՝ ստանալով գրանտային միջոցներ:
Լրագրողի դիտարկմանը, թե ծրագիրը հնարավո՞ր է՝ ատկատի նոր ձև լինի, և հարցին, թե ինչպե՞ս է իրականացվելու վերահսկողությունը, Ա.Աշոտյանը պատասխանեց. «Կհայտնաբերենք, կպատժենք: Կլինի՝ կգրեք, չէ՝ խնդրում եմ, չգրեք»:
ԿԳ նախարարը նշեց, որ իրենք աշխատելու են սննդի անվտանգության պետական տեսչության հետ, որպեսզի երեխաներին մատակարարվող սնունդն անվտանգ լինի:
«Նվազե՞լ, թե՞ ավելացեել է առաջին դասարանցիների թիվը» հարցին Արմեն Աշոտյանը պատասխանեց, որ իրենք դա կամփոփեն սեպտեմբերին 5-ին, 10-ին էլ կներկայացնեն, առայժմ որևէ թիվ ներկայացնել չեն կարող:
Ի դեպ, նախարարը նշեց, որ այն ծնողերն ու համայնքները, որոնք կցանկանան աջակցել ծրագրին, կարող են աջակցել, սակայն դա պարտադիր չէ:
Լուսանկարը՝ PanARMENIAN Photo-ի
