«Նոր քաղաքական լիդերների ձևավորման խոչընդոտները և հնարավորությունները Հայաստանում» թեմայով կազմակերպված քննարկման ժամանակ այսօր հայաստանյան քաղաքական դաշտում լիդերության և սերնդափոխության վերաբերյալ իրենց տեսակետները ներկայացրին խորհրդարանական և արտախորհրդարանական կուսակցությունների ներկայացուցիչները:
ՀՀԿ-ական պատգամավոր Կարեն Ավագյանը նկատեց, որ «Հանրապետական» կուսակցությունը իր գործունեության ընթացքում ապացուցել է, որ իրականացնում է սահուն սերնդափոխություն. «Ունեցել է առաջին երիտասարդական կազմակերպությունը, որը դարբնոց է եղել թե՛ քաղաքական դաշտի, թե՛ գործադիր իշխանության համար կադրեր պատրաստելու համար: ՀՀԿ-ն տարիների ընթացքում ունեցել է չորս լիդեր»:
ԱԺ «Ժառանգություն» խմբակցության ղեկավար Ստեփան Սաֆարյանն էլ իր խոսքում նշեց, որ երիտասարդ լիդերը, որն անցել է իշխանական բոլոր սանդղակներով, որևէ փոփոխություն և նոր մտքեր չի կարող բերել. «Մեզ պետք չեն նոր լիդերներ հին կառավարման մատոռով»:
Սաֆարյանն ընդգծեց, որ այսօր լիդերներ չեն ձևավորվում, քանզի խնդիրը միջավայրի մեջ է. «Մենք բոլորս նապոլեոններ ենք և գեներալներ: Քաղաքական միջավայրը Հայաստանում դեստրուկտիվ է և վտանգավոր: Քաղաքականությունը թանկ հաճույք է և դրա մեջ լինելու համար պետք է ունենալ փող, ինչպես նաև պետք է պատրաստ լինել ենթարկվելու ռեպրեսիաների և ճնշումների»:
Ժառանգական պատգամավորը նաև նկատեց, որ այսօրվա քաղաքական միջավայրում արժեքներն ու սկզբունքները երկրորդական են և ներկայիս քաղաքական դաշտում կարողանում են առաջ գնալ միայն «պրագմատիկ տղաները»:
