Այսօր Հայաստանի Ազգային ժողովում ներկայացված համաներման մասին որոշման նախագծի հրապարակումից հետո տարբեր մեկնաբանություններ հնչեցին քաղբանտարկյալներ Նիկոլ Փաշինյանի և Սասուն Միքայելյանի ազատ արձակման վերաբերյալ, մասնավորապես կարծիք կար, թե համաներումը չի կարող տարածվել նրանց վրա:
«Առաջին լրատվականը» պարզաբանման խնդրանքով դիմեց «Հայկական ժամանակ» օրաթերթի գլխավոր խմբագիր Նիկոլ Փաշինյանի փաստաբան Վահե Գրիգորյանին:
Վ.Գրիգորյանը նշեց. «Նիկոլ Փաշինյանի նկատմամբ համաներում չկիրառելու որևէ հիմք չեմ տեսնում, և համաներման որոշումը ընդունելուց հետո նա պետք է ազատ արձակվի: Ինչ վերաբերում է 9-րդ կետի 2-րդ ենթակետին, ապա եթե ուշադրություն դարձնեք` բառացիորեն ձևակերպպված է. «Համաներումը չկիրառել այն անձանց նկատմամբ, որոնց հանդեպ վերջին տասը տարվա ընթացքում՝ նշանակված պատժաչափը կրճատվել է Հայաստանի Հանրապետության նախագահի ներում շնորհելու մասին հրամանագրերի կամ Հայաստանի Հանրապետության Ազգային ժողովի համաներում հայտարարելու մասին որոշումների հիման վրա»:
Նիկոլ Փաշինյանի նկատմամբ ընդամենը մեկ որոշում է կիրառվել մինչև հիմա: Այնինչ այս տեքստը, եթե մնա անփոփոխ, ենթադրում է, որ նրա նկատմամբ մեկից ավելի համաներման որոշում պետք է կիրառված լիներ, որպեսզի 9-րդ կետի 2-րդ ենթակետի ուժով այս համաներումը չկիրառվեր նրա նկատմամբ: Այսինքն` այստեղ պարզ տրամաբանություն է», նկատեց փաստաբանը:
Վ.Գրիգորյանը հավելեց նաև. «Եթե այս տեքստը այս տեսքով ընդունվեց, և Նիկոլ Փաշինյանին ազատ չարձակեցին` դա արդեն իրավունքի խախտում կլինի: Այսինքն՝ մի բան է համաներման որոշումը, մեկ այլ բան է դրա ի կատար ածման գործընթացը»։
Վ.Գրիգորյանը մատնանշեց նաև համաներման 4-րդ կետը՝ նկատելով, որ այն վերաբերում է Նիկոլ Փաշինյանի գործին. «Պատժից ազատել, բացառությամբ սույն որոշման 8-րդ կետի 4-րդ և 5-րդ ենթակետերով նախատեսված դեպքերի, դիտավորյալ հանցագործություն կատարելու համար նախկինում ազատությունից զրկելու հետ կապված պատիժ չկրած այն անձանց, որոնք դատապարտվել են`
1) առավելագույնը հինգ տարի ժամկետով ազատազրկման և սույն որոշումն ուժի մեջ մտնելու oրվա դրությամբ կրել են ոչ պակաu, քան պատժի մեկ քառորդը,
2) առավելագույնը տաuը տարի ժամկետով ազատազրկման և սույն որոշումն ուժի մեջ մտնելու oրվա դրությամբ կրել են ոչ պակաu, քան պատժի մեկ երրորդը»: