Եվրոպական միությունն աջակցում է հայերի վերադարձին և վերաինտեգրմանը: ԵՄ կողմից ֆինանսավորվող «Վերաինտեգրման քաղաքականություն վերադարձող հայ միգրանտների համար» նոր ծրագրի մեկնարկի արարողությունը տեղի կունենա երեքշաբթի օրը` հունվարի 31-ին, Երևանում:
Ըստ ծրագրի տնօրեն Ժան Դոմինիկ Ֆաբրիի՝ «Վերաինտեգրման քաղաքականություն վերադարձող հայ միգրանտների համար» ծրագրի նպատակն է հզորացնել կառավարման ոլորտում Հայաստանի կարողությունները` կիզակետում պահելով վերաինտեգրմանն ուղղված գործողությունները: «Մենք կաշխատենք իրավասու մարմինների և քաղաքացիական հասարակության հետ` հզորացնելու նրանց կարողությունները` հայրենիք հայերի արժանապատիվ կայուն վերադարձին և վերաինտեգրմանն ակտիվ աջակցելու համար», ասաց պարոն Ֆաբրին: Նա ավելացրեց. «Մենք նաև կանդրադառնանք անկանոն միգրացիայի մարտահրավերներին` խրախուսելով ապահով և օրինական միգրացիան, ինչպես նաև ամրապնդելով միգրացիայի դրական ազդեցությունը Հայաստանի սոցիալական զարգացման վրա»:
Ծրագիրն ամբողջովին ֆինանսավորվում է Եվրամիության կողմից Շարժունակության շուրջ գործընկերության հնարավորություն /Mobility Partnership Facility/ նախաձեռնության շրջանակներում, որն իրականացնում է Միգրացիոն Քաղաքականության Զարգացման Միջազգային կենտրոնը: Շարժունակության շուրջ գործընկերության հնարավորություն նախաձեռնության դրամաշնորհի գնահատման կոմիտեն պայմանագիր է շնորհել «Ֆրանսիայի իմիգրացիայի և ինտեգրման գրասենյակ»-ին: Բյուջեն կազմում է մոտ 493.000 (չորս հարյուր իննսուն երեք հազար եվրո) կամ 249.605900 (երկու հարյուր քառասուն ինը միլիոն վեց հարյուր հինգ հազար ինը հարյուր դրամ), իրականացման ժամկետը` շուրջ 10 ամիս մինչև սույն թվականի սեպտեմբերի վերջ:
