Ֆուտբոլի Անգլիայի լիգայի գավաթի խաղարկության կիսաեզրափակչի պատասխան խաղում «Մանչեսթեր Յունայթեդը» առանց Հայաստանի ազգային հավաքականի ավագ Հենրիխ Մխիթարյանի 2:1 հաշվով զիջեց «Հալ Սիթիին»: Այս թիմերի միջև առաջին խաղում «Մանչեսթերը» հաղթել էր 2:0 հաշվով և չնայած պարտությանը՝ դուրս եկավ եզրափակիչ, որտեղ կմրցի «Սաութհեմփթոնի» հետ:
Բացի Մխիթարյանից՝ Մոուրինյոն մեկնարկային կազմից դուրս էր թողել, մասնավորապես, Մատային, Մարսիալին և Վալենսիային: Ըստ երևույթին, պորտուգալացի մասնագետը հանգստանալու հնարավորություն էր տվել առանցքային ֆուտբոլիստներին, քանզի ընդամենը երկու օր անց «Մանչեսթերը» Անգլիայի գավաթի խաղարկության շրջանակներում սեփական հարկի տակ պատասխան հանդիպումը կանցկացնի «Ուիգանի» հետ, իսկ փետրվարի 1-ին արդեն Պրեմիեր լիգայի 23-րդ տուրում կհանդիպի նույն «Հալ Սիթիին»:
Ինչևէ, երեկ անգլիական տիտղոսակիր ակումբը ցուցադրեց չափից ավելի դժգույն և ձանձրալի խաղ: Առաջին խաղակեսում «Հալը» բոլոր առումներով գերազանցեց մրցակցին: Գնդակին տիրելու տոկոսային հարաբերակցությունն էր 57-43՝ հօգուտ դաշտի տերերի: «Մանչեսթեր Յունայթեդին» հաջողվել էր կատարել 192, իսկ «Հալին»՝ 230 ճիշտ փոխանցում:
Վիճակագրական այս տվյալները փաստում են, որ հերթական անգամ Մոուրինյոն չկարողացավ խաղի մեկնարկից գործել առաջին համարով, այսինքն՝ թելադրել հանդիպման ընթացքը: Ոմանք կարող են պնդել, որ սա գավաթային հանդիպում էր, «Յունայթեդը» առաջին խաղից հետո մեծ առավելություն ուներ, և ուղղակի նպատակահարմար չէր դիտարժան ֆուտբոլ ցուցադրել: Ինչ խոսք, հաղթողին չեն դատում: Բայց ընդունենք, որ «Մանչեսթեր Յունայթեդի» պես գրանդ ակումբները, որոնք ունեն միլիոնավոր երկրպագուներ, որոշակի մակարդակից ցածր չպետք է խաղան:
Դժվար չէ ենթադրել, որ ընդմիջմանը Մոուրինյոն կոշտ խոսակցություն էր ունեցել խաղացողների հետ, քանզի երկրորդ կեսում «Մանչեսթերը» սկսեց անհամեմատ ավելի արագ գործել: Մոտ 20 րոպե հյուրերը ակտիվ պրեսինգ էին կիրառում, ինչի հետևանքով «Հալի» պաշտպանները սխալվում էին:
«Եվրոսպորտ» հեռուստաընկրության ռուս մեկնաբանը, ով հիասթափված էր «Մանչեսթերի» ցուցադրած խաղից, շարունակ հիշում էր Հենրիխ Մխիթարյանին: «Հայ կիսապաշտպանը արագաշարժ ֆուտբոլիստ է: Զարմանում եմ ուղղակի՝ ինչո՞ւ Մոուրինյոն նրան խաղադաշտ դուրս չի բերում: Ցանկալի կլիներ տեսնել Մխիթարյանին այս դիմակայությունում»,-ասում էր նա:
Համաձայնվելով ռուս մեկնաբանի հետ՝ կարծում ենք, որ մեր ֆուտբոլիստն իսկապես կկարողանար բեկել դժգույն խաղի ընթացքը: Մասնավորապես, «Յունայթեդում» բացակայում էր այն ֆուտբոլիստը, ով արագ գործողություններով կնպաստեր գնդակի արագ տեղափոխվելուն մրցակցի տուգանային հրապարակի մատույցներ: Լինգարդն արագ կիսապաշտպան է, բայց նա դեռևս մոլորված է դաշտում, և հատկապես Իբրահիմովիչի հետ նրա համագործակցությունն այնքան էլ չի ստացվում: Ռեշֆորդը ևս արագ խաղացող է և կարողանում է շրջանցել մի քանի ֆուտբոլիստների: Այդուհանդերձ, նրան չես դասի մտածող խաղացողների շարքում:
Ի դեպ, հանդիպման օրը Մոուրինյոն նշում էր ծննդյան 54-րդ տարեդարձը: Այս հանգամանքը պետք է ստիպեր ֆուտբոլիստներին առանձնակի նվիրումով խաղալ և հաղթանակի հասնելով նվեր մատուցել մարզչին: Որքան էլ տարօրինակ է, «Մանչեսթերի» ֆուտբոլիստներն արեցին ուղիղ հակառակը: Ֆուտբոլային շատ բլոգերներ կարծիք են հայտնել, որ «Յունայթեդի» խաղացողները յուրովի շնորհավորեցին պորտուգալացի մասնագետին՝ պարտությանը մեկտեղ ցույց տալով անորակ ֆուտբոլ:
Խաղից հետո Մոուրինյոն հայտարարել է, որ ամեն ինչ կարգին է, և դրական արդյունքների շարքը ամենևին չի ընդհատվել: «Հանդիպման հաշիվը 1:1 է: Մենք չենք պարտվել: Ես տեսել եմ միայն երկու գոլ: Արդեն 18 խաղ է՝ մենք չեն պարտվում: Սա հրաշալի արդյունք է: 11 մետրանոցին չեմ ցանկանում անդրադառնալ: Ես ինձ բավական հանգիստ եմ դրսևորել հանդիպման ընթացքում: Մենք նվաճեցինք եզրափակչի ուղեգիրը, ինչը ամենակարևորն է»,- ասել է Ժոզե Մոուրինյոն: Վերջինս փաստացի չի ընդունում առաջին կեսում մրցավարի կողմից նշանակված 11 մետրանոցը, որից հետո «Հալը» առաջ անցավ հաշվի մեջ:
