ԱԺ Մարդու իրավունքների մշտական հանձնաժողովի փոխնախագահ, ԱԺ հանրապետական խմբակցության պատգամավոր Ռաֆիկ Պետրոսյանը անդրադառնալով համաներմանը՝ նշեց, թե սա միայն նրա համար չէ, որ մարտի 1-ին դատապարտված անձինք ազատվեն. «Համաներման հիմնական մասը, եթե նկատել եք, վերաբերում է հաշմանդամներին, 60-ն անց մարդկանց, ազատամարտիկներին… Այն անձանց մեջ, որոնց վրա տարածվում է, Մարտի 1-ի մասը չնչին մաս է և փոքր տոկոս է կազմում: Ընդհանուր քաղաքականության արդյունք է սա»:
Ի դեպ, Ռաֆիկ Պետրոսյանը, արձագանքելով «Առաջին լրատվական»-ի և «Ժամանակ» օրաթերթի այն տեղեկություններին, որ քրեակատարողական հիմնարկներում տույժ ունեցող բանտարկյալներից մոտ 1,000 դոլար են պահանջում բնութագիր տալու դիմաց, արդարադատության նախարարին և Ազգային անվտանգության ծառայությանը դիմելով, նշեց, որ, ըստ լրագրողների, տեղի է ունենում շուկայի վերածելու գործընթաց: «Այսինքն՝ ձեր վրայից տույժը հանելու համար այսքան գումար տվեք։ Ես հավատում եմ լրագրողներին: Պետք է ոչ միայն զգուշանալ, այլև խիստ միջոցառումներ մշակել, որ նրանց թույլ չտրվի, որ նախագահի այս գեղեցիկ միջոցառումը չվարկաբեկվի, մարդիկ իրենց ձեռքերը չտաքացնեն նախագահի այս գեղեցիկ տեքստի վրա»,- առաջարկեց Ռաֆիկ Պետրոսյանը:
