Վրաստանի ընդդիմադիր Լեյբորիստական կուսակցությունը կոչ է անում վարչապետ Բիձինա Իվանիշվիլիին՝ իր կնոջը՝ Եկատերինա Խվեդելիձեին պատկանող «9-րդ ալիք» հեռուստաընկերությունը փոխանցել աշխատակիցների տնօրինմանը: Այս մասի հայտնում էGruziya Online-ը:
Իվանիշվիլին հայտարարել է, որ իր ընտանիքը որոշել է վաճառել «9-րդ ալիք»-ն ու «Ինֆո 9»-ը ինքնարժեքի 1/3-ի չափով՝ այն պայմանով, որ աշխատողները պահպանեն իրենց աշխատանքն ու ԶԼՄ-ները շարունակեն գործել:
Հակառակ դեպքում սեպտեմբերի 1-ին դրանք կփակվեն: Վարչապետը, որպես նման որոշման պատճառ, անվանել է հոկտեմբերի 27-ին կայանալիք նախագահական ընտրությունները, որոնք, նրա խոսքերով՝ պետք է անցնեն միջազգային չափորոշիչներին համապատասխան:
Հեռուստաընկերությունն անձնակազմի որոշմամբ արդեն դադարեցրել է հեռարձակումը, իսկ «Ինֆո 9» գործակալությունը դեռևս շարունակում է գործել:
Լեյբորիստական կուսակցության անդամ Լեյլա Գափրինդաշվիլիի խոսքերով՝ նախագահական ընտությունների շեմին, երբ ընտրությունների լիարժեք թափանցիկությունը պարտադիր է, և երբ հատուկ առաքելություն է դրված հեռուստատեսության ու լրագրողների վրա՝ բնակչությանն օբյեկտիվ տեղեկատվություն տրամադրելու համար, ԶԼՄ-ներին առավելագույնս օգնելու փոխարեն՝ Իվանիշվիլին ակտիվորեն շարունակում է նախորդների գործը:
Նա պնդում է, թե լուրջ ճնշում է գործադրվում «Մաեստրո» հեռուստաընկերության վրա: Թե ով և ինչպես է այդ ճնշումը գործադրում, Գափրինդաշվիլին չի հստակեցրել:
Կուսակցության անդամները պահանջում են, որ Իվանիշվիլին հեռուստաալիքի տնօրինումը հավասար մասնաբաժիններով բաշխի աշխատողներին:
