Ճապոնիայի տիեզերական գործակալության մասնագետները (JAXA) ստիպված են եղել ընդհատել աշխարհի ամենափոքր՝ գերփոքր արբանյակով SS-520 հրթիռ-կրիչի թռիչքը, որը մի քանի ժամ առաջ արձակվել է հարավային Կագոսիմա պրեֆեկտուրայի Ուտինոուրա տիեզերակայանից: Այս մասին հայտնում է NHK հեռուստաալիքը՝ հղում անելով JAXA-ի ներկայացուցիչներին:
JAXA-ի աշխատակիցը նշել է, որ իրենք ստիպված են եղել SS-520-ի թռիչքն ընդհատել տեխնիկական անսարքության պատճառով:
Ճապոնիայի տիեզերական գործակալության գիտնականները պարբերականին հայտնել են, որ արձակումից որոշ ժամանակ անց իրենք չեն կարողացել հրթիռի վիճակի մասին տվյալներ ստանալ: NHK-ն նշում է, որ JAXA-ի մասնագետները որոշել են չվառել հրթիռ-կրիչի երկրորդ աստիճանը, SS-520-ի թռիչքն ընդհատվել է, հրթիռը ծովն է ընկել:
SS-520-ն արձակվել է հունվարի 15-ին տեղի ժամանակով 08:33-ին (մեր ժամանակով՝ 03:33): Գիտնականները ենթադրում էին, որ այն ուղեծիր կհասնի:
NHK-ն նշում է, որ արբանյակի բարձրությունը կազմել է ընդամենը 35 սմ: Հրթիռի տրամագիծը կազմել է 52 սմ, քաշը՝ 2,6 տոննա:
