Այս տարվա առաջին կիսամյակում մեր երկրի տնտեսությունը աճել է ավելի քան 4 տոկոսով (4.4 տոկոսով՝ 2012թ.-ի առաջին կիսամյակի համեմատ) և , ինչպես միշտ, հիմնական շարժիչ ուժը արդյունաբերությունն է:
Ոլորտում արտադրանքի աճը 8.3 տոկոս է: Այս աճի մեծ մասը բաժին է ընկնում մշակող արդյունաբերությանը, որը և՛ կազմում է ամբողջ արդյունաբերական արտադրանքի մոտ 67 տոկոսը, և՛ նույն ժամանակում աճել է ավելի քան 10 տոկոսով: Փոքր չէ նաև հանքագործական արդյունաբերության և բացհանքերի շահագործման ներդրումը ոլորտի աճի մեջ, որը չնայած ավելացել է 16.5 տոկոսով, բայց մասնաբաժինը ամբողջ արդյունաբերական արտադրանքի մեջ ընդամենը 17.5 տոկոս է:
Մշակող արդյունաբերության կազմում մեկ երրորդը բաժին է ընկնում սննդամթերքի արտադրությանը, այնուհետև՝ հիմնային մետաղների (19.9%) և խմիչների (16.3%) արտադրությունն է:
Սյունիքը շարունակում է մնալ երկրորդ արդյունաբերական հսկան: Մարզին է բաժին ընկնում ամբողջ արդյունաբերական արտադրանքի ավելի քան 18 տոկոսը: Առաջին տեղում մայրաքաղաքն է՝ 40.6 տոկոսով: Արդյունաբերական եռյակը եզրափակում է Կոտայքը, որտեղ նույն ժամանակում արտադրվել է արդյունաբերական արտադրանքի մոտ 12 տոկոսը: