ROJ TV քրդական հեռուստաալիքը, որը հեռարձակվում էր Դանիայից, դադարեցնում է իր գոյությունը, քանի որ հեռուստաալիքը ֆինանսավորող ընկերությունները (ROJ TV, «Մեսոպոտամիա Բրոդքաստ») ի վիճակի չեն վճարել տուգանքը, որը սահմանել է Դանիայի դատարանը: Ինչպես հաղորդում է «Գոլոս Ռոսիի» ռադիոկայանը, այս մասին հայտարարել է հեռուստաալիքի ղեկավար Իմդաթ Յըլմազը:
«Վճռորոշ հարված էր դանիական բանկերի և դատարանի՝ տուգանքն անհապաղ վճարելու պահանջը՝ չսպասելով գերագույն դատարանի վճռին, չնայած հեռուստաալիքի կողմնակիցներն արդեն սկսել էին միջոցներ հավաքել՝ այն վճարելու համար»,- ասել է նա:
Հուլիսին Դանիայի Արևելյան վերաքննիչ դատարանը որոշում է կայացնում հետ վերցնել հեռուստաալիքի հեռարձակման արտոնագիրը՝ ընկերություններին դատապարտելով 670 հազարական եվրո տուգանքի:
Ավելի վաղ առաջին ատյանի դատարանը հեռուստաալիքին ճանաչել էր Քրդական աշախատավորական կուսակցության «ձայնը»: Հեռուստաալիքը ֆինանսավորող ընկերությունները տուգանվել էին, սակայն հեռուստաալիքը պահպանել էր հեռարձակման արտոնագիրը:
