Իրավապաշտպան Ռուֆաթ Սաֆարովը կանխատեսում է Ադրբեջանում «բռնությունների եւ հետապնդումների համատարած ալիք»: Նրա կարծիքով, հայտնի գիտնական, հանրային-քաղաքական գործիչ Իբադօղլուի նկատմամբ խափանման միջոցի փոփոխության,-նա բանտից տեղափոխվել է տնային կալանքի,- որոշումը կայացվել է այն հույսով, որ Միացյալ Նահանգների «պետական դեպարտամենտը կօգտագործի ազդեցությունը եւ ադրբեջանցի քառասուն պաշտոնյաների դեմ պատժամիջոցներ սահմանող օրինագիծը Կոնգրեսում պաշտոնական շրջանառության չի դրվի»:
Տեղի է ունեցել, ինչպես Սաֆարովն է գնահատում՝ «ճիշտ հակառակը»: «Պատժամիջոցային ցուցակն» ընդլայնվել է եւս չորս պաշտոնյայի անուններով: Ըստ Սաֆարովի՝ Իլհամ Ալիեւին «խիստ անհանգստացնում է, որ պատժամիջոցների ենթակա են դիտվում Պետական անվտանգության ծառայության տնօրեն Նաղիեւը, պաշտպանության փոխնախարար Միրզոեւը, հատուկ նշանակության զորախմբի առանձին բրիգադի հրամանատար Սալաեւը»:
«Թուրան» գործակալության Վաշինգտոնի թղթակցի տեղեկացվածությամբ՝ նրանք մեղադրվում են անցած սեպտեմբերին Լեռնային Ղարաբաղում «հատուկ ռազմական գործողության ընթացքում պատերազմական հանցագործությունների մեջ»: Իրավապաշտպան Սաֆարովի հայացքով՝ Ալիեւը «շարունակելու է այլախոհների նկատմամբ հետապնդումները, որպեսզի հանրությանը տրամադրի Արեւմուտքի դեմ»: Այսինքն, ինչքան շատ մարդ ձերբակալվի, այնքան ադրբեջանցիների գիտակցության մեջ ներարկվելու է, որ ԱՄՆ-ը «հետապնդում է ղարաբաղյան երկրորդ պատերազմի հերոսներին, պղծում ադրբեջանցի ժողովրդի պատմական հաղթանակը»:
Սաֆարովը համոզված է, որ մի «փուլում Ալիեւը Վաշինգտոնին առաջարկելու է, որ ինքը ներում է շնորհում քաղբանտարկյալներին, եթե Կոնգրեսը դադարի պատերազմական հանցագործ անվանել Նաղիեւին, Միրզոեւին, Սալաեւին եւ Ալեսկերովին»: Սաֆարովը քաղբանտարկյալներին անվանում է Բաքվի եւ Վաշինգտոնի միջեւ «քաղաքական առեւտրի առարկա»:
Ադրբեջանցի իրավապաշտպանը եզրակացնում է, որ եթե Արեւմուտքն «ընդունի Հարավային Կովկասի նոր իրողությունները, ապա Ադրբեջանում մարդու իրավունքների եւ ազատությունների հետ կապված իրավիճակը կարող է բարելավվել»: Սա Բաքվի, անձամբ Իլհամ Ալիեւի կողմից մշակված քաղտեխնոլոգիա է: Գերխնդիր է սեպտեմբերյան ահաբեկչության եւ Արցախում էթնիկ զտումների հարցի «առմիշտ փակումը»: Քաղաքական ի՞նչ «առեւտուր կկայանա» Բաքվի եւ Վաշինգտոնի միջեւ: Բացառված չէ, որ Ալիեւը նախ «առեւտուր առաջարկի» քաղբանտարկյալներին. Նրանք ազատություն կստանան, եթե համերաշխորեն դատապարտեն «ղարաբաղյան պատերազմի հաղթանակը պղծելու» արեւմտյան քաղաքականությունը: