Globovision հեռուստաալիքի փոխանցմամբ՝ վենեսուելական բիզնեսը ծանր ժամանակներ է ապրում, իսկ քաղաքացիները զանգվածաբար լքում են երկիրը։ Այդ մասին երեքշաբթի հայտարարել է Առևտրի ու ծառայությունների ազգային խորհրդի առաջին փոխնախագահ Ալֆոնսո Ռիերան։
Նրա խոսքերով՝ միայն վերջին 10 տարիներին Վենեսուելայում փակվել է մոտ 500.000 ընկերություն և ձեռնարկություն. «1998 թվականին մենք ունեիքն 800.000 ընկերություն, մինչդեռ ներկայումս դրանց թիվը մոտավոր գնահատականներով չի գերազանցում 230.000-ը։
Վերջին տարիներին երկրից արտագաղթել է երկու միլիոն վենեսուելացի, իսկ աշխատատեղերի թիվը կրճատվել է մեկ միլիոնով։ Այդ ամենը վկայում է, որ գործերը վատ են ընթանում։
Իրավիճակից հնարավոր չէ ելք գտնել միայն աշխատավարձ բարձրացնելով, ինչպես որ իշխանություններն արեցին նախորդ շաբաթ։ Եթե չպայքարես խորքային խնդիրների դեմ, միևնույն է՝ չես հասնի արդյունքի, անգամ եթե հազար անգամ բարձրացնես աշխատավարձը»։
Նախորդ կիրակի Վենեսուելայի իշխանությունները նվազագույն աշխատավարձն ու թոշակը բարձրացրել են 50 տոկոսով։
