Թվում է, թե կրես-աղցանի, սխտորի և հողի համերով պաղպաղակներից հետո քաղցրակերներին այլևս ոչնչով զարմացնել չի լինի: Սակայն Torimi սրճարանին դա հաջողվել է: Այս ամառ Torimi-ն թռչնի համով պաղպաղակ է ներկայացրել: Սառը դեսերտի երեք նոր համեր, որոնք ստեղծվել են Small Bird Expo թռչնի ցուցադրության համար:
Դրանք ներկայացնում են Ճապոնիայում տարածված և ամենասիրված երեք դեկորատիվ տնային թռչունների համերը՝ ճավայական ճնճղուկի, կակադուի և գանգրահեր թութակի համերը: Պաղպաղակի արտադրության ժամանակ ոչ մի թռչնակ չի տուժել:
Խոհարարները խնդրին ստեղծագործական մոտեցում են ցուցաբերել և փորձել են բաղադրատոմսերով փոխանցել թռչնի համի զգացողությունը: Ճավայական ճնճղուկի պաղպաղակի մեջ զեֆիրի կտորներ կան. նույնպիսի անորսալի, փափուկ և կլոր, ինչպիսին է այս թռչնակը:
Գանգրահեր թութակին նվիրված պաղպաղակը մեղրա-խնձորային համ ունի, քանի որ դրանք աղմկոտ թռչնակներ են: Կակադուն խոհարարներին ոգեշնչել է սերմերի առատությամբ պաղպաղակ ստեղծել՝ արևածաղկի, դդմի և այլնի:
