Ադրբեջանական Salam News գործակալության փոխանցմամբ, Ադրբեջանի արտգործնախարարության մամլո ծառայության ղեկավար Էլհան Պոլուխովը պատասխանել է Հայաստանի պաշտպանության նախարար Սեյրան Օհանյանին, ով հայտարարել է, թե ղարաբաղյան պատերազմի վերսկսման դեպքում Հայաստանն իրավունք ունի ակնկալել ՀԱՊԿ-ի իր գործընկերների օգնությունը:
Պոլուխովը նշել է. «Հայաստանն «օկուպացրել» է Ադրբեջանի տարածքը: Այս հակամարտությունը բացառապես Ադրբեջանի «ներքին» գործն է: Եվ եթե մեր երկիրը որոշի ռազմական ճանապարհով «ազատագրել» իր հողերը, դա չի կարող որակվել որպես Հայաստանի վրա Ադրբեջանի հարձակում: Ադրբեջանը ռազմական գործողություններ կիրականացնի «իր» տարածքում»:
Հիշեցնենք, որ այս տարվա հունվարի կեսերին ռուս փորձագետ, Կովկասի խնդիրների կենտրոնի գիտաշխատող Նիկոլայ Սիլաևն ադրբեջանական լրատվամիջոցներին տված հարցազրույցում նշել էր, որ պատերազմի վերսկսման դեպքում, եթե այն ընդգրկի նաև Հայաստանի տարածքը, Ռուսաստանը կհայտնվի շատ անհարմար իրավիճակում, ինչի համար էլ Մոսկվան ամեն գնով պետք է խուսափի պատերազմի վերսկսումից.
«Եթե զինված բախումները սահմանափակվեն միայն Ղարաբաղի տարածքով, ապա Ռուսաստանը չի միջամտի, իսկ ահա եթե Ադրբեջանը ռազմական հարված հասցնի ՀԱՊԿ գծով Ռուսաստանի դաշնակից Հայաստանին, ապա դա արդեն լրիվ այլ բան է»: