Վրացական News Georgia կայքի փոխանցմամբ, Վրաստանի և Իսրայելի արտգործնախարարությունները փոխըմբռնման հուշագիր են ստորագրել քաղաքական խորհրդատվություններ անցկացնելու մասին:
Երկու երկրների արտգործնախարարությունների պատվիրակությունների միջև խորհրդատվությունները կայացել են մայիսի 23-24-ը Թբիլիսիում: Վրացական պատվիրակությունը գլխավորել է փոխարտգործնախարար Դավիթ Ջալագանիան, իսկ իսրայելականը` Իսրայելի ԱԳՆ-ի գլխավոր տնօրենի տեղակալ Փինհաս Ավիվին:
Հանդիպման ժամանակ կողմերը քննարկել են երկկողմանի հարաբերությունների լայն շրջանակներին առնչվող խնդիրներ: Կողմերը պատրաստակամություն են հայտնել առավել ակտիվ աշխատանքներ տանելու, որպեսզի դրանով իսկ խորացնեն տարբեր ոլորտներում առկա իրենց համագործակցությունը:
Իսրայելական կողմը հերթական անգամ հայտարարել է Վրաստանի ինքնիշխանությանն ու տարածքային ամբողջականությանը իր աջակցության մասին:
Հիշեցնենք, որ վերջին շրջանում որոշակիորեն լարվել էին վրաց-իսրայելական հարաբերությունները, ինչը պայմանավորված էր երկու երկրների միջև ընթացող «բիզնես պատերազմներով» ու աբխազական գործոնով:
