Թուրքական Zaman թերթի փոխանցմամբ, Թուրքիայում ահաբեկչական հռչակված և արգելված Քրդստանի աշխատավորական կուսակցության (PKK) գործով Թուրքիայի երկու նահանգներում միանգամից ձերբակալվել է 24 մարդ: Խոսքը երկրի արևմտյան հատվածում ընկած Քյութահյայի ու արևելյան հատվածում ընկած էրզինջանի (Երզնկա) նահանգների մասին է:
Ընդ որում, Քյութահյայում ձերբակալվել է 14 մարդ, իսկ էրզինջանում` 10 մարդ: Նրանք մեղադրվում են PKK անդամ հանդիսանալու կամ PKK-ի հետ համագործակցելու մեջ:
Հիշեցնենք, որ թուրքական Sabah թերթի հաղորդմամբ էլ PKK-ը զինյալները, համագործակցելով «էրգենեկոն» ահաբեկչական կազմակերպության հետ, պետք է Հյուսիսային Իրաքից ներթափանցեն Թուրքիայի տարբեր շրջաններ և արյունալի ակցիաներ կազմակերպեն` դրանով իսկ հունիսի 12-ին կայանալիք խորհրդարանական ընտրությունների նախաշեմին ապակայունացնելով իրավիճակը երկրում:
