«ԲԻՈ ԳՐՈՒՊ» ՍՊԸ-ն հարկային արտոնություն կստանա: Ընկերության ներդրումային ծրագրի շրջանակում օգոստոսի 15-ից մինչև դեկտեմբերի 30-ը ներառյալ ներմուծվող 300 միլիոն դրամը գերազանցող արժեքով ապրանքների մաքսային մարմինների կողմից հաշվարկվող ավելացված արժեքի հարկի վճարման ժամկետը կհետաձգվի մինչև 2016 թվականի օգոստոսի 15-ը:
Ներդրումային ծրագրով ընկերությունը նախատեսում է Կոտայքի մարզի Ջրվեժ համայնքում կառուցել մոտ 10.7 հազ ք.մ. մակերեսով ջերմոցային տնտեսություն` վարունգի և չորս տեսակի լոլիկի աճեցման համար: Ներդրուման չափը մոտ 657.7 մլն դրամ է` սարքավորումների ձեռքբերման համար, որի արդյունքում հնարավոր կլինի ընկերության արտադրանքի ծավալը հասցնել տարեկան մոտ 700 մլն դրամի (2014թ), որի գերակշիռ մասը կարտահանվի Վրաստան, Ռուսաստանի Դաշնություն և ԱՄԷ: Ծրագրով կստեղծվի 22 աշխատատեղ:
Ընկերության ներկայացրած ծրագրի ամփոփված գնահատականը կազմել է 26.7 միավոր, որը բավարար է արտոնություն ստանալու համար:
Գնահատականի մեջ հաշվի են առնվում իրատեսական ու հեռանկարային լինելը, ռիսկայնության աստիճանը, զբաղվածության ընդլայնումը, նորարարությունն ու մրցակցային առավելությունը, արտահանման խթանումը, ներմուծման փոխարինումն ու ենթակառուցվածքների զարգացումը և այլ գերակա նպատակներ:
Գործադիրի անդամներն այս որոշման նախագիծը կհաստատեն օգոստոսի 15-ի նիստին: