ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է Համաշխարհային բանկի (ՀԲ) Հայաստանի սոցիալական ներդրումների ծրագրի ղեկավար Իվան Դրաբեկին: Հանդիպմանը մասնակցել է նաև Հայաստանի սոցիալական ներդրումների հիմնադրամի (ՀՍՆՀ) գործադիր տնօրեն Աշոտ Կիրակոսյանը:
ՏԿՆ հասարակայնության հետ կապերի բաժնից «Առաջին լրատվական»-ին հայտնում են, որ քննարկվել են Հայաստանի սոցիալական ներդրումների հիմնադրամի զարգացման ռազմավարության, ՀՍՆՀ-ի ընթացիկ և առաջիկա տարիների ծրագրերին վերաբերող հարցեր:
Տեղեկացվել է, որ միջգերատեսչական աշխատանքային խմբի կողմից, որում ներգրավված են եղել նաև ՀԲ փորձագետներ, արդեն մշակվել է ՀՍՆՀ զարգացման ռազմավարությունը, որն արժանացել է նաև ՀԲ թիմի դրական գնահատականին: Փոխվարչապետը կարևորել է շահագրգիռ նախարարությունների մասնակացությամբ փաստաթղթի քննարկումը, մոտեցումների վերջնական հստակեցումը, որից հետո այն կներկայացվի ՀՀ կառավարություն:
Կողմերն անդրադարձել են նաև ՀՍՆՀ ընթացիկ ծրագրին: Մասնավորապես տեղեկացվել է, որ դեռևս չի իրականացվել համայնքապետերի ուսուցում նախատեսող բաղադրիչը: Փոխվարչապետն առաջարկել է ուսուցումները կազմակերպել առաջիկայում նախատեսվող համաժողովների շրջանակում և ընտրել արդիական թեմաներ, որոնք կարծարծեն նաև տեղական ինքնակառավարման համակարգում նախատեսվող բարեփոխումների ուղղությունները:
Քննարկվել են նաև Երկրի աջակցության նոր ռազմավարության շրջանակում ՀՍՆՀ ծրագրերի համար հատկացվող միջոցների ծավալներին, ՀՍՆՀ ծրագրերի ընդլայնման հնարավորություններին առնչվող հարցեր:
Լուսանկարը՝ Photolure-ի
